Ukraina prezidenti Vladimir Zelenskiy ikkinchi tinchlik sammiti Hindistonda o‘tkazilishi mumkinligini aytdi. Bu haqda u The Times of India nashriga bergan intervyusida ma’lum qilgan.
“Biz Hindiston bosh vaziri Narendra Modi bilan suhbatlashdik. Bizda tinchlik sammiti platformasi bor, ishonamanki, har qanday munosib poytaxtda ikkinchi sammitni o‘tkazishimiz mumkin. Bosh vazir sammitni tashkil qila oladi”, dedi Ukraina prezidenti.
Zelenskiy Ukraina tinchlik sammitining navbatdagi yig‘ilishiga tayyorgarlik ko‘rishi kerakligini qo‘shimcha qildi. Biroq uning so‘zlariga ko‘ra, Kiyev ba’zi davlatlar, jumladan, Xitoy, Braziliya, Hindiston, Yevropa ittifoqi a’zolari yoki Afrika qit’asi davlatlaridan ma’lum takliflarni eshitmoqchi.
Avvalroq Ukraina prezidenti ofisi rahbari maslahatchisi Darya Zarivnaya noyabr oyida ikkinchi tinchlik sammiti o‘tkazilmasligini ma’lum qilgandi.
“Noyabr oyida ikkinchi tinchlik sammiti o‘tkazilmaydi. Ammo tayyorgarlik ishlari davom etmoqda. Hozircha sammitdagi masalalar bo‘yicha konferensiyalar o‘tkazilmoqda va ular kommyunike qabul qilinishi bilan yakunlanadi. Ushbu kommyunikelardagi asosiy qoidalar kelgusi ikkinchi sammitning tinchlik rejasi uchun asos bo‘lib xizmat qiladi”, degan Zarivnaya.
Izoh (0)