Shveysariya Tashqi ishlar vazirligi Rossiya-Ukraina mojarosini tinch yo'l bilan hal qilish bo‘yicha ikkinchi konferensiyaga tayyorlanmayotganini ma’lum qildi.
Shu bilan birga, vazirlik Shveysariya rasmiylari hali ham muzokaralarni boshlash uchun imkoniyat izlayotganini ta'kidladi.
“Hozirda Shveysariya ikkinchi tinchlik sammitiga hozirlik ko‘rmayapti. Endi bizning maqsadimiz boshqa davlatlar bilan birgalikda Ukraina va Rossiya o‘rtasida muzokaralar boshlanishi uchun shart-sharoit yaratishdir”, deyiladi Shveysariya Tashqi ishlar vazirligi xabarida.
11-sentyabr kuni Germaniya kansleri Olaf Shols Rossiyani ikkinchi tinchlik konferensiyasiga taklif qilishni yoqladi. Ko‘pchilik tadbir birinchi sammit bo‘lib o‘tgan Shveysariyada bo‘lib o‘tadi, deb taxmin qilgandi. Ammo Shveysariya bu taxminni inkor etmoqda.
Avvalroq Shveysariya TIV xalqaro xavfsizlik departamenti rahbari Gabriel Luchinger navbatdagi sammit Saudiya Arabistonida o‘tkazilishi mumkinligini aytgan edi.
Ukraina bo‘yicha birinchi sammit 15–16-iyun kunlari Shveysariyaning Byurgenstok shahrida bo‘lib o‘tgan edi. Bloombergning yozishicha, Ukraina rasmiylari ikkinchi sammitni noyabrgacha tashkil qilmoqchi.
Izoh (0)