Украина президенти Владимир Зеленский иккинчи тинчлик саммити Ҳиндистонда ўтказилиши мумкинлигини айтди. Бу ҳақда у Тhе Times of India нашрига берган интервьюсида маълум қилган.
“Биз Ҳиндистон бош вазири Нарендра Моди билан суҳбатлашдик. Бизда тинчлик саммити платформаси бор, ишонаманки, ҳар қандай муносиб пойтахтда иккинчи саммитни ўтказишимиз мумкин. Бош вазир саммитни ташкил қила олади”, деди Украина президенти.
Зеленский Украина тинчлик саммитининг навбатдаги йиғилишига тайёргарлик кўриши кераклигини қўшимча қилди. Бироқ унинг сўзларига кўра, Киев баъзи давлатлар, жумладан, Хитой, Бразилия, Ҳиндистон, Европа иттифоқи аъзолари ёки Африка қитъаси давлатларидан маълум таклифларни эшитмоқчи.
Аввалроқ Украина президенти офиси раҳбари маслаҳатчиси Даря Заривная ноябрь ойида иккинчи тинчлик саммити ўтказилмаслигини маълум қилганди.
“Ноябрь ойида иккинчи тинчлик саммити ўтказилмайди. Аммо тайёргарлик ишлари давом этмоқда. Ҳозирча саммитдаги масалалар бўйича конференциялар ўтказилмоқда ва улар коммюнике қабул қилиниши билан якунланади. Ушбу коммюникелардаги асосий қоидалар келгуси иккинчи саммитнинг тинчлик режаси учун асос бўлиб хизмат қилади”, деган Заривная.
Изоҳ (0)