Oq uy Milliy xavfsizlik kengashi matbuot kotibi Jon Kirbi brifingda Shimoliy Koreya qo‘shinlari Ukrainadagi mojaro zonasida paydo bo‘ladigan bo‘lsa, ular “qonuniy harbiy nishonga” aylanishini ta’kidladi.
“Biz bu askarlar Rossiya harbiylari bilan birga jangga kirishadimi yoki yo‘qmi, hozircha bilmaymiz. Ammo bu, albatta, juda xavotirli holat. Agar ular Ukrainaga qarshi jang qilishga kirishadigan bo‘lsa, ular qonuniy nishonga aylanadi va ukrainalik harbiylar ham xuddi rus askarlaridan o‘zini himoya qilganidek, Shimoliy Koreya askarlaridan o‘zini himoya qilishi kerak bo‘ladi”, dedi Kirbi.
Rossiya hududiga KXDRdan harbiy xizmatchilarning kelishi haqidagi xabarlar o‘tgan hafta paydo bo‘lgan edi. Janubiy Koreya razvedkasi hisob-kitoblariga ko‘ra, Uzoq Sharqdagi Rossiya poligonlarida Shimoliy Koreyaning 1,5 ming askari bor.
Amerika tomoni maʼlumotlariga ko‘ra, oktyabr oyida Vladivostokka kamida 3 ming shimoliy koreyalik harbiy kelgan va ular bir necha harbiy poligonlar orasida taqsimlangan. Janubiy Koreya prezidenti Yun Sok Yol buni provokatsiya deb atadi.
Kreml Shimoliy Koreya harbiylarining Rossiyaga yuborilishi haqidagi xabarlarni bir-biriga zid deb atadi. Shimoliy Koreya esa bu xabarlarni mish-mish sifatida baholadi.
Izoh (0)