Rossiyaning eng yirik suyultirilgan tabiiy gaz (STG) loyihasi — Novatek kompaniyasining Arktik STG 2 AQSH sanksiyalarining yangi bosqichidan so‘ng ishlab chiqarishni to‘xtatdi. Bu haqda Bloomberg xabar berdi.
Agentlik suhbatdoshlariga ko‘ra, qurilishiga qariyb 10 yil vaqt ketgan 25 milliard dollarlik zavod o‘z gaziga xaridor topa olmayapti, buning natijasida sotilmagan zaxiralar to‘planib bormoqda. Oktyabr oyida Novatek Arktik STG 2 uchun gaz qazib olishni kuniga 5,3 million kub metrgacha qisqartirgan.
Bloomberg manbalariga ko‘ra, zavodda gazni tijorat maqsadida suyultirish to‘xtatilgan, faqat uning texnik holatini saqlab qolish uchun zarur bo‘lgan operatsiyalar davom etmoqda. Avgust oyidan beri Arktik STG 2 8 ta STG yukini jo‘natgan, ammo Novatek bozor narxlariga nisbatan 40 foizgacha chegirmalarni taklif qilganiga qaramay, ulardan birini sotishga erisha olmagan.
Gaz xaridorlari AQSH sanksiyalar kiritgan ushbu loyihadan tankerlarni qabul qilishdan xavotirda: avgust oyida loyihaga aloqador 8 ta kema qora ro‘yxatga kiritilgan edi. Novatek zavodining o‘zi o‘tgan yilning noyabr oyida Amerika cheklovlariga duch kelgan, shundan so‘ng xorijiy aksiyadorlar o‘z ishtirokini muzlatib qo‘ygan. Janubiy Koreya kemasozlik zavodi esa muz sinfidagi gaz tashuvchilarni yetkazib berishdan bosh tortgan.
Rejaga ko‘ra, Arctic STG 2 uchta texnologik liniyada yiliga 19,8 million tonna STG ishlab chiqarishi kerak edi. Birinchi liniya 2023-yil avgust oyida foydalanishga topshirilgan, ikkinchisi 2024-yil avgustida tegishli manzilga yetkazilgan, uchinchisi qurilishini esa 2026–2028-yillarga ko‘chirishga qaror qilingan.
Izoh (0)