Россиянинг энг йирик суюлтирилган табиий газ (STG) лойиҳаси — Новатэк компаниясининг Arktik STG 2 АҚШ санкцияларининг янги босқичидан сўнг ишлаб чиқаришни тўхтатди. Бу ҳақда Bloomberg хабар берди.
Агентлик суҳбатдошларига кўра, қурилишига қарийб 10 йил вақт кетган 25 миллиард долларлик завод ўз газига харидор топа олмаяпти, бунинг натижасида сотилмаган захиралар тўпланиб бормоқда. Октябрь ойида Новатэк Arktik STG 2 учун газ қазиб олишни кунига 5,3 миллион куб метргача қисқартирган.
Bloomberg манбаларига кўра, заводда газни тижорат мақсадида суюлтириш тўхтатилган, фақат унинг техник ҳолатини сақлаб қолиш учун зарур бўлган операциялар давом этмоқда. Август ойидан бери Arktik STG 2 8 та STG юкини жўнатган, аммо Новатэк бозор нархларига нисбатан 40 фоизгача чегирмаларни таклиф қилганига қарамай, улардан бирини сотишга эриша олмаган.
Газ харидорлари АҚШ санкциялар киритган ушбу лойиҳадан танкерларни қабул қилишдан хавотирда: август ойида лойиҳага алоқадор 8 та кема қора рўйхатга киритилган эди. Новатэк заводининг ўзи ўтган йилнинг ноябрь ойида Америка чекловларига дуч келган, шундан сўнг хорижий акциядорлар ўз иштирокини музлатиб қўйган. Жанубий Корея кемасозлик заводи эса муз синфидаги газ ташувчиларни етказиб беришдан бош тортган.
Режага кўра, Arktik STG 2 учта технологик линияда йилига 19,8 миллион тонна STG ишлаб чиқариши керак эди. Биринчи линия 2023 йил август ойида фойдаланишга топширилган, иккинчиси 2024 йил августида тегишли манзилга етказилган, учинчиси қурилишини эса 2026–2028 йилларга кўчиришга қарор қилинган.
Изоҳ (0)