Futbol bo‘yicha Rossiya, Fransiya hamda Italiya chempionatida tur o‘yinlari bo‘lib o‘tdi. Bundan tashqari, “Roma” Yevropa Ligasida qatnashdi.
Ushbu o‘yinlarda o‘zbekistonlik futbolchilar o‘z klublari safida maydonga tushdi.
“SSKA” RPLning 13-tur uchrashuvida “Fakel” klubi bilan bahs olib bordi. Uchrashuvda hisob ochilmadi. Abbosbek Fayzullayev bahsni boshlang‘ich tarkibda boshladi va to‘liq o‘ynadi.
Sofascore nashri yarim himoyachining o‘yinini 7,2 ballga baholadi. Moskvaliklar safida Igor Diveyev eng yuqori 7,6 ballga loyiq ko‘rilgan.
24-oktyabr kuni “Roma” Ukrainaning “Dinamo Kiyev” klubi bilan Yevropa Ligasi tur uchrashuvi doirasida to‘qnashdi. Uchrashuvda Dovbik tomonidan kiritilgan yagona gol “Roma”ga g‘alaba keltirdi.
Ushbu uchrashuvda Eldor Shomurodov 53-daqiqada Dovbik o‘rniga maydonga tushdi. Sofascore nashri futbolchining o‘yinini 6,8 ballga baholadi. 7,9 ball olgan “Roma” himoyachisi Zeki Chelik o‘yinning eng yaxshi futbolchisi sifatida e’tirof etildi.
Kecha, 27-oktyabr kuni “Roma” “Fiorentina” mehmoni bo‘ldi. Mezbonlarning 5:1 hisobidagi g‘alabasi bilan yakunlangan uchrashuvda Eldor Shomurodov zaxirada qoldi.
Fransiya chempionatining 9-tur uchrashuvida “Lans” “Lill” klubini qabul qildi. Uchrashuvda mezbonlar to‘pga ko‘proq egalik qildi va ko‘plab vaziyatlarga ega bo‘ldi. Ammo ulardan foydalana olmadi. Bahs taqdirini qo‘shimcha daqiqalarda mehmonlar tomonidan urilgan 2 gol hal qildi va “Lans” uyida ochko yo‘qotdi.
Uchrashuvda O‘zbekiston terma jamoasi himoyachisi Abduqodir Husanov to‘liq harakat qildi. Himoyachi ko‘p bora hujumlarni tashkil etishda ishtirok etdi. Birinchi bo‘limda portal tomonidan 7 balldan yuqoriga baholangan Abduqodirning o‘yini “Lans” mag‘lubiyati sabab bahs so‘ngida pasaydi — 6,9 ball.
Mehmonlar darvozaboni Lukas Chevalier uchrashuvda 7,8 ballga loyiq ko‘rildi.
Izoh (0)