Germaniya bosh vazirining o‘rinbosari va iqtisodiyot vaziri Robert Xabek Qatar bilan suyultirilgan tabiiy gaz (STG) yetkazib berishni nazarda tutuvchi energetika sohasida hamkorlik qilishga kelishib oldi. Bu haqda Die Welt xabar bermoqda. Xabek Qatar amiri bilan Dohadagi muzokaralar chog‘ida uzoq muddatli energetika hamkorligi bo‘yicha kelishuvga erishgan.
Vazirning ta’kidlashicha, endi kompaniyalar o‘rtasida STG yetkazib berish bo‘yicha muayyan shartnomalarni tuzishi qoldi. Yig‘ilishda RWE, E.ON va Uniper kabi konsernlar vakillari ishtirok etgan, deya ta’kidlaydi nashr.
Iqtisodiyot vazirligi rahbari avvalroq Germaniya kuzgacha Rossiya ko‘miridan, 2022-yil oxiriga kelib esa Rossiya neftidan deyarli to‘liq mustaqil bo‘lish niyatida ekanini ma’lum qilgandi. Shu bilan birga, Xabek Rossiya gaziga qaramlikdan xalos bo‘lish qiyinroq bo‘lishini tan olgan, chunki Germaniya STG importi uchun o‘z imkoniyatlariga ega emas.
Vazirning ta’kidlashicha, hozir Germaniyaning asosiy maqsadi mamlakatda STG terminallarini qurish bo‘lib, Berlin Norvegiya, AQSH, Kanada va Qatar bilan gaz yetkazib berish bo‘yicha muzokaralar olib bormoqda.
Bungacha Yevrokomissiya prezidenti Ursula fon der Lyayen Rossiya energiyasidan tezroq voz kechish rejasi tayyorlanayotganini ma’lum qilgandi. “May oyi oxirigacha biz 2027-yilgacha Rossiya gazi, nefti va ko‘miriga qaramlikdan bosqichma-bosqich voz kechish bo‘yicha taklif kiritamiz. Bu zarur milliy va Yevropa resurslari tomonidan qo‘llab-quvvatlanadi”, — degan u. Biroq Yevropaning ayrim yetakchilari, jumladan, Germaniya kansleri Olaf Shols Rossiyadan energiya yetkazib berishni taqiqlashga qarshi chiqqan.
Izoh (0)