Yevropa kengashi Rossiyaga qarshi iqtisodiy va individual sanksiyalarning 14-paketini qabul qildi. Bu haqda kengash bayonotida xabar berildi.
Cheklovlar Ukrainaning hududiy yaxlitligi, suvereniteti va mustaqilligiga putur yetkazuvchi yoki tahdid soluvchi harakatlar uchun javobgar bo‘lgan yana 116 nafar jismoniy va yuridik shaxsni o‘z ichiga olgan.
Cheklovga uchragan yuridik shaxslar qatorida “Artek” bolalar oromgohi, Qodirov jamoat fondi, “Ural” aviakompaniyasi va “Sovkomflot” ham bor.
Ma’lum bo‘lishicha, YI Rossiyadan suyultirilgan tabiiy gaz (STG) sotib olishni davom ettirib, uning Yevropa portlari orqali tranzitiga cheklovlar qo‘yadi. Endi YI kompaniyalari uchinchi mamlakatlardagi sho‘ba korxonalarining Rossiyaga qarshi sanksiyalarni chetlab o‘tmasligini ta’minlash uchun javobgardir.
Shuningdek, navbatdagi sanksiya paketi quyidagilarni o‘z ichiga olgan:
- sanksiyalarni chetlab o‘tish uchun foydalaniladigan Rossiyaning “soya floti” deb ataladigan 27 ta kemasiga nisbatan cheklovlar;
- investitsiyalarni taqiqlash, Arctic STG 2 va Murmansk STG kabi STG loyihalarini yakunlash uchun tovarlar, texnologiyalar va xizmatlarni taqdim etish;
- YI o‘z aviakompaniyalariga Rossiyadan jismoniy va yuridik shaxslar buyurtma qilgan dunyo bo‘ylab charter va xususiy reyslarni amalga oshirishga taqiq;
- uchinchi mamlakatlarga harbiy texnikani sotuvchi Yevropa kompaniyalari Rossiyaga reeksport xavfini aniqlash va baholash va ularni kamaytirishga qodir mexanizmlarni joriy etishlari kerak;
- Rossiyadan geliy importini va marganets rudalarini, bir qator plastmassa turlarini, noyob tuproq elementlarini va elektron komponentlarni Rossiyaga eksport qilishga taqiq;
- YIdagi siyosiy partiyalar, nodavlat tashkilotlar va media kompaniyalarning Rossiya hukumatidan pul olishiga taqiq;
- Rossiya bankining moliyaviy xabarlarni uzatish tizimi (SWIFT’ning ruscha analogi) bo‘yicha chora-tadbirlar;
- rossiyaliklar tomonidan ma’lum turdagi intellektual mulkni Yevropada ro‘yxatdan o‘tkazishga taqiq;
- sanksiyalar qo‘llanishi natijasida Rossiya kompaniyalari tomonidan ularga yetkazilgan zararni qoplashni talab qiladigan Yevropa kompaniyalariga taqiq.
Izoh (0)