“Tolibon” harakati Hirot viloyatidagi haydovchilarga burqasiz ayollarni mashinalariga o‘tqazishni taqiqladi. Bu haqda Hasht-e Subh Daily xabar berdi.
Ma’lum qilinishicha, viloyatdagi haydovchilar burqasiz ayollarga xizmat qilmaslik haqida ogohlantirilgan. So‘nggi uch kun davomida Hirot viloyatidagi bir qator chorrahalarda “Tolibon” harakati a’zolari burqa kiymagan ayollarni mashinadan tushirgan.
Avvalroq ijtimoiy tarmoqda ayol haydovchiga xizmat ko‘rsatayotgani uchun haydovchiga “Tolibon” a’zosi tarsaki tushirgani videosi e’lon qilingandi.
[telegram_yembed_post link="https://t.me/daryo_live/80514"]
2022-yil “Tolibon” harakatining oliy rahbari Haybatulla Ohundzoda Afg‘onistonda ayollarning yuz va tanani to‘liq yopadigan paranji (burqa)siz ko‘chaga chiqishini taqiqlovchi farmonni imzolagandi.
Farmonda ayollarning ko‘chada muhim ishi bo‘lmasa, uyda o‘tirgani ma’qul ekani ham qayd etilgan.
Paranji kiyishdan bosh tortganlik uchun jazo bor. Agar ayol ko‘chaga birinchi marta yuzi ochiq holda chiqsa, uning uyiga “Tolibon” vakillari kelib, turmush o‘rtog‘i, aka-ukasi yoki otasi bilan profilaktik suhbat o‘tkazadi. Ikkinchi safar ayolning xatti-harakati uchun mas’ul bo‘lgan erkak tushuntirish uchun vazirlikka chaqiriladi. Agar bu hol uchinchi marta sodir bo‘lsa, erkak vasiy sudlanadi va uch kunga qamaladi.
Afg‘onistonda ayollarga nisbatan qo‘llangan taqiqlar
“Tolibon” 2021-yil avgustida hokimiyatni qo‘lga kiritganidan buyon ayollar va qizlarga oid turli taqiqlar joriy etilgan.
Bungacha afg‘onistonlik ayollarning BMT idoralarida ishlashi, erkaklarga ayollar uchun kiyim tikish, ayollarning erkak shifokorlarga borishi, ayollarning universitet va maktabda ta’lim olishi, ayollarning shifoxonaga yolg‘iz borishi va ularning istirohat bog‘iga tashrif buyurishi taqiqlagan. Shuningdek, Afg‘onistonda oilalar va ayollarning bog‘lari yoki yashil hududlari bo‘lgan restoranlarga kirishi va ayollar ovozi eshitilgan reklamalarni efirga uzatish taqiqlangan.
Izoh (0)