Afg‘oniston Inson huquqlari komissiyasining ishonchli manbalari “Tolibon”ning ikki jangarisi G‘ur viloyatida homilador yosh ayolni otib o‘ldirganini ma’lum qildi. Bu haqda Etilaatroz xabar berdi.
Komissiyaning ta’kidlashicha, “Tolibon” yetakchilari o‘z xalqiga nisbatan “shafqatsiz va g‘ayriinsoniy yondashuv” uchun javobgarlikka tortilishi kerak. Ayolning ismi Zarmina bo‘lib, 27-aprelga o‘tar kechasi Firuzko‘h shahrining “Sadsiya” mahallasidagi uyida o‘ldirilgan.
Inson huquqlari komissiyasi Zarmina ikki “Tolibon” tomonidan o‘ldirilgani, ulardan biri G‘urdagi “Tolibon” qo‘mondonlaridan birining o‘g‘li mulla Quddus ekanini aytdi. Ikki qurollangan jangari 25 yoshli ayolni zo‘rlamoqchi bo‘lgan, ayol ularga qarshilik ko‘rsatib baqirgan. Shundan keyin mulla Quddus tomonidan jabrlanuvchi otib tashlangan.
Komissiyaning qo‘shimcha qilishicha, qurollangan “Tolibon” avval ham turli vaziyatlarda “qizlar va yosh ayollarni majburan turmushga bergan yoki jinsiy aloqaga undagan”.
“Doimiy ravishda xalqning hayoti va ruhiy xavfsizligini ta’minlash zarurligini ta’kidlagan ‘Tolibon’ yetakchilari va vakillari afg‘on xalqiga, milliy va xalqaro inson huquqlari tuzilmalari oldida g‘ayriinsoniy yondashuvlari yuzasidan javob berishi kerak”, — deyiladi Inson huquqlari bo‘yicha komissiya hisobotida.
Komissiya Birlashgan Millatlar Tashkiloti va xalqaro hamjamiyatdan “Tolibonning bunday g‘ayriinsoniy xatti-harakatlari”ni inson huquqlari buzilishi va ayniqsa, ayollar huquqlari buzilishining yaqqol misollari sifatida o‘rganish va tahlil qilishni so‘radi.
Izoh (0)