“Bir kilo meva sotib olishga odamlarning qurbi yetmay qolgan” — afg‘onistonlik savdogar (video)

Balx viloyati Afg‘oniston shimolidagi muhim va serhosil viloyatlardan biri bo‘lib, O‘zbekistonning Surxondaryo viloyati bilan chegaradosh. Markazi Mozori Sharif shahri bo‘lgan Balx viloyati Afg‘onistonning 9 ta viloyatini meva bilan ta’minlaydi.

“Daryo”ning Afg‘onistondagi muxbiri viloyatda meva savdosi qay darajadaligini yaqindan bilish uchun savdogarlar bilan suhbatlashdi.

Mozori Sharif shahridagi meva sotuvchilari bu yil Balx viloyatining barcha tumanlarida mevali daraxtlarning hosildorligi oshgani va bu ho‘l mevalarning bir qismi hatto qo‘shni viloyatlarga ham eksport qilinishini aytdi.

“Bu yil olma, gilos, o‘rik, qulupnayning hosildorligi o‘tgan yillarga nisbatan sezilarli darajada oshdi”, — deydi meva sotuvchisi Tamim Bek.

Uning aytishicha, avvallari Balx viloyati o‘ziga zarur bo‘lgan meva va qishloq xo‘jaligi mahsulotlarini O‘zbekiston, Eron, Pokistondan import qilgan. Endilikda ichki ehtiyojni qondirish bilan birga, boshqa viloyatlarga ham barcha turdagi mahsulotlar yetkazib berilmoqda.

Meva sotuvchilari mevalarning narxi arzonlashgan bo‘lsa ham, odamlarning bir kilogramm mevani 1 yoki 2 dollarga sotib olishga qurbi yetmay qolganini aytmoqda. Ularga ko‘ra, o‘n kishi narx so‘raydi, ammo bir kishi sotib oladi.

Mozori Sharifda mevalarning narxi (1 kilogramm o‘lchovida) quyidagicha.

• Olma 1,15 dollar;
• Kivi 1,38 dollar;
• O‘rik 1,15 dollar;
• Apelsin 1,73 dollar;
• Banan 1,73 dollar;
• Tarvuz 0,35 dollar;
• Qulupnay 1,5 dollar;

Mozori Sharifdagi meva do‘konlarida esa bir kilogramm anor 2,31 dollardan sotilmoqda va bu mevalarning narxi har kuni o‘zgarib bormoqda.