Kiyev viloyatidagi Brovari shahrida 18-yanvar kuni ertalab bolalar bog‘chasi binosi yaqiniga vertolyot qulab tushdi, shundan keyin yong‘in boshlandi. Bu haqda “Suspilne” telekanali viloyat politsiyasiga tayanib xabar berdi.
Ukraina prezidenti ofisi rahbari o‘rinbosari Kirill Timoshenko, o‘z navbatida, Brovarida “ijtimoiy infratuzilma obyektiga uchar qurilma qulab tushgani” haqida ma’lum qildi. Kiyev viloyati ma’muriyati rahbari Aleksey Kuleba aniqlik kiritishicha, vertolyot bolalar bog‘chasi va turar joy o‘rtasiga kelib tushgan.
Voqea chog‘ida bolalar bog‘chasida xodimlar va tarbiyalanuvchilar bo‘lgan, dedi Kuleba. Uning so‘zlariga ko‘ra, binodan hamma evakuatsiya qilingan.
Politsiyaning dastlabki ma’lumotlariga ko‘ra, vertolyot qulashi oqibatida bir necha kishi halok bo‘lgan. Ba’zi manbalar besh kishi jabrlanganini ma’lum qilgandi. Politsiya qayd etishicha, jabrlanganlar orasida bolalar yo‘q.
Izoh (0)