Sayyoradagi eng keksa ayol, rohiba Andre sifatida ko‘proq tanilgan Lyusil Rendon 118 yoshida vafot etdi. Bu haqda Ginness rekordlari kitobi saytida xabar berildi.
U 1904-yil 11-fevral kuni Fransiya janubida tug‘ilgan. Shu tariqa, Lyusil 119 yoshga to‘lishiga 25 kun qolganida hayotdan ko‘z yumgan.
Fransuz ayoli shu yilning aprelida dunyodagi eng keksa ayol deb tan olingan edi, u bu maqomga qariyb to‘qqiz oy egalik qildi. Undan avval yaponiyalik Kane Tanaka sayyoraning eng keksa ayoli hisoblanardi, u 119 yoshida vafot etgan.
Rendon yoshligida o‘qituvchi va guvernant (badavlat oilalarda bolalarni tarbiyalash uchun maxsus yollangan ayol) bo‘lib ishlagan, Ikkinchi jahon urushi yillarida bolalarga qarovchilik qilgan, keyin esa yetimlar va qariyalar bilan ishlagan. 1944-yilda katolik rohibalikka o‘tgan.
2021-yilda rohiba Andre koronavirus bilan kasallanib o‘tdi. Xastalik unda uch hafta davom etgan, biroq unda simptomlar va asoratlar kuzatilmagan.
Ginness rekordlari kitobi talqiniga ko‘ra, Yer yuzasida eng uzoq umr kechirgan ayol fransiyalik Janna Luiza Kalman (1875—1997) bo‘lgan, u 122 yoshida vafot etgan. Erkaklar orasida esa yaponiyalik Dziroemon Kimura (1897—2013) eng ko‘p — 116 yil yashagan.
Izoh (0)