Ispaniya bosh vaziri Pedro Sanches fikricha, Yevropa mamlakatlarida Rossiya hukumatining yashirin tarafdorlari bor, ular Moskvaga nisbatan mayllarini sir tutmoqda. Ispaniya bosh vaziri Kremlning Yevropadagi maxfiy agentlariga qarshi kurashishga chaqirdi, deb yozadi La Vanguardia.
“Rossiya avtokrati (hokimi mutlaq) dunyoni parchalab tashlash va vaqtni orqaga qaytarish bo‘yicha jaholatli intilishlarida yolg‘iz emas. Uning Yevropada ittifoqchilari ko‘p, ular hozir Putinga nisbatan mayllarini yashirmoqda, ammo bir yilgina avval uni ziyorat qilib, uning uslublarini ko‘klarga ko‘tara edi”, — dedi Sanches Davosdagi Jahon iqtisodiyot forumida.
Ukrainada harbiy operatsiya boshlanganidan keyin Italiya sobiq bosh vaziri Silvio Berluskoni Vladimir Putin bilan aloqalarda ayblangan edi. 24-fevralga qadar Rossiya va Italiya siyosatchilari ko‘p marta uchrashgan va o‘zlarini do‘stlar deb atagan edi. Aprelda Silvio Berluskoni Rossiya prezidentining qarorini qoraladi. Biroq 2022-yil oktabrida Berluskoni Putin bilan munosabatlari qayta tiklanganini ma’lum qildi. Uning so‘zlariga ko‘ra, Vladimir Putin, go‘yoki, uning 86 yoshiga atab bir necha shisha vodka sovg‘a qilgan. Keyinroq Berluskoni bu voqeani hazil deb atadi.
Rossiya bilan aloqalarda Germaniya kiberxavfsizlik agentligi rahbari Arne Shenbom ham ayblangan edi. U “Germaniya kiberxavfsizlik bo‘yicha kengashi” birlashmasi orqali Rossiya maxsus xizmatlari bilan aloqalarda gumonlangan. Biroq dalillar bo‘lmagani tufayli, undan ayblovlar olib tashlangan va u yangi lavozimga tayinlangan edi.
Izoh (0)