AQSH Davlat departamenti Belarusda 25 kishiga, jumladan mahalliy deputatlarga nisbatan viza cheklovlarini joriy qildi. Bu haqda departament matbuot xizmatiga tayanib, “Korrespondent.net” xabar berdi.
“Lukashenko (Belarus prezidenti) rejimi Belarus xalqi va uning demokratik intilishlarini, xususan, demokratik muxolifat yetakchisi Svetlana Tixanovskaya va boshqa demokratik faollar ustidan siyosiy sabablarga ko‘ra sirtdan sud jarayoni o‘tkazish hamda asossiz ayblovlar bilan ularni ta’qib qilishni davom ettirmoqda. Inson huquqlarining bunday tarzda buzilishiga javoban Davlat departamenti AQSH prezidentining 8015-sonli deklaratsiyasiga binoan demokratiyani buzishdagi roli uchun 25 kishiga nisbatan viza cheklovlarini e’lon qiladi”, — deyiladi xabarda.
Viza cheklovlari Belarus Milliy Assambleyasi deputatlariga nisbatan joriy etildi, bunga sabab sifatida ularning “terrorizmga urinishlar” da’vosi bilan sudlangan shaxslarga o‘lim jazosini tayinlash to‘g‘risidagi qonunni qabul qilishdagi roli ko‘rsatilgan.
Davlat departamentining qo‘shimcha qilishicha, bunday ayblovlardan “demokratik muxolifat va fuqarolik jamiyatini bostirish va qo‘rqitish uchun” foydalanilmoqda.
Rasmiy Vashingtonning ta’kidlashicha, rejim tinch namoyishchilarni, demokratik muxolifatni, jurnalistlarni, kasaba uyushmalari faollarini, huquq himoyachilari va oddiy belaruslarni ta’qib qilishda davom etayotgan bir paytda AQSH chetdan qarab turmaydi.
Ma’lumot uchun Belarusda muxolifatchi Svetlana Tixanovskaya ustidan sirtdan sud jarayoni boshlangan.
Izoh (0)