Turkmaniston va Rossiya prezidentlari Serdar Berdimuhamedov va Vladimir Putin 17-yanvar kuni telefon orqali suhbatlashdi.
“Rossiya-Turkmaniston strategik sherikligi bo‘yicha erishilgan darajani yuqori baholab, davlat rahbari energetika sohasidagi amaliy hamkorlik bo‘yicha bir qator muayyan masalalarni muhokama qildi”, — deyiladi Kreml matbuot xizmati xabarida boshqa tafsilotlar keltirilmagan holda.
Shuningdek, Rossiya hukumati rahbari Mixail Mishustin 19—20-yanvar kunlari Turkmanistonga tashrif buyurishi ma’lum bo‘ldi.
2022-yil sentabrida Berdimuhamedov va Putin SHHT sammiti doirasida uchrashuv o‘tkazgan edi. O‘shanda ham Turkmaniston va Rossiya prezidentlari energetik hamkorlik mavzusini muhokama qilgan.
Avvalroq Turkmaniston bosh vaziri o‘rinbosari Shohim Abdurahmonov mamlakatda birinchi yerosti gaz ombori qurilishini ma’lum qilgan edi. Uning so‘zlariga ko‘ra, gaz ombori “tovar gazi zaxiralarini ta’minlash uchun” quriladi.
Tabiiy gaz zaxiralari bo‘yicha Turkmaniston Rossiya, Eron va Qatar bilan birgalikda dunyoning birinchi to‘rtligiga kiradi.
2019-yil aprelida “Gazprom” Turkmaniston bilan shartnomali aloqalar qayta tiklanganini ma’lum qildi, munosabatlar 2016-yilda bir tomonlama tartibda bekor qilingan edi. O‘sha yiliyoq Rossiya kompaniyasi Turkmangaz” davlat kompaniyasida tabiiy gaz sotib olish bo‘yicha shartnoma tuzdi. Uning doirasida “Gazprom” yiliga 5,5 milliard kub metr gaz oladi.
Izoh (0)