Afg‘onistonda sobiq deputat ayol otib o‘ldirildi

Afg‘oniston quyi palatasining sobiq deputati Mersal Nabizoda Kobuldagi uyida o‘ldirib ketildi. Bu haqda Hasht-e Subh Daily xabar berdi.

Manbalarga ko‘ra, Nabizoda 14-yanvar kuni tunda Kobulning Ahmad Shoh Baba tumanidagi Marg‘umi 25-ko‘chasida otib o‘ldirilgan. Sobiq deputatning qanday o‘ldirilgani haqid batafsil ma’lumot keltirilmagan. “Tolibon” politsiyasining Kobuldagi bosh boshqarmasi matbuot kotibi Xolid Zadran Nabizoda otib o‘ldirilganini tasdiqlagan. Ayolga o‘q uzilishi oqibatida uning akasi ham yaralangani aytilmoqda.

Afg‘onistonning turli viloyatlarida so‘nggi paytlarda sirli qotilliklar ko‘paygan. Jumladan, Badaxshon viloyatida Abu Umar taxallusli “Tolibon”ning tojikistonlik a’zosi o‘ldirib ketilgan. U tajribali minachi va “Tolibon”ning chet ellik yosh jangchilariga murabbiylik qilgan.