Tojikiston Sog‘liqni saqlash va aholini ijtimoiy himoya qilish vazirligi o‘zining shahar va tumanlardagi bo‘linmalariga ta’lim boshqarmalari bilan aloqada bo‘lib turishni va mavsumiy kasalliklar bo‘yicha vaziyatni nazorat ostiga olishni topshirdi. Maktab o‘quvchilari orasida mavsumiy gripp bilan kasallanish o‘sgan taqdrida, vazirlik karantin e’lon qiladi. Bu haqda Asia Plus xabar bermoqda.
SSV vakili Navro‘z Jafarov ma’lum qilishicha, shu hafta oxirida vazirlik inspektori o‘quv muassasalarida gripp bilan kasallanish bo‘yicha statistikani taqdim etadi, shundan keyin profilaktika choralari ko‘riladi.
Avvalroq Tojikiston SSV karantin e’lon qilish uchun asos yo‘qligini — kasallik mamlakatda buning uchun yetarli darajada tarqalmaganini aytgandi. O‘shanda Jafarov o‘quvchilarning 50 foizi darslarga kelmagan taqdirda karantin e’lon qilinishini ta’kidlagandi.
Shu bilan birga, vazirlik mamlakatda mavsumiy gripp aylanib yurganini, bu qo‘rqinchli emasligini, chunki bu kasallik har yili qayd etilishini ma’lum qilgandi. Ammo ba’zi fuqarolar ayni paytda tarqalgan gripp simptomlari koronavirusnikiga o‘xshash ekanini, bemorlar uni juda og‘ir o‘tkazayotganini aytmoqda. Biroq SSV koronavirus hozircha qayd etilmaganini, bu faqat mavsumiy gripp ekanini ta’kidladi.
Tojikistonda rasman to‘qqiz oydan buyon koronavirusga chalinish holatlari qayd etilmayapti. Lekin dekabr boshida SSV qo‘shni mamlakatlarda COVID-19 ga chalinish holatlari ko‘paygani munosabati bilan, chegaralarda va aeroportlarda nazoratni kuchaytirishni buyurdi.
Shuningdek, vazirlik avvalroq mamlakatda H1N1-09 yoki cho‘chqa grippiga chalingan bemorlar aniqlanganini ma’lum qilgandi. Ammo bu mavsumiy gripp ekanini da’vo qilib, xavotirga asos yo‘qligini aytmoqda.
Ayni paytda Rossiyada cho‘chqa grippi avj olmoqda. Kasallik uning 74 ta hududida aniqlandi. Shuningdek, Qozog‘iston va Qirg‘izistonda ham aholi orasida cho‘chqa grippi tarqalmoqda.
Izoh (0)