Qirg‘iziston davlat kotibi Suyinbek Kasmambetov Markaziy Osiyo davlatlarini tarixiy birlikka qaytishga chaqirdi. U Qozog‘istonda bo‘lib o‘tgan media-forumda bu bo‘yicha nutq so‘zladi.
Kasmambetovning so‘zlariga ko‘ra, SSSR parchalanganidan so‘ng, Markaziy Osiyoning beshta davlati mustaqillikka erishgach, strategik maqsadlarini belgilab, o‘zlarining rivojlanish modeli bilan faol shug‘ullandi.
“Bu qiyin yo‘l. To‘g‘risini aytsam, o‘shanda mintaqaviy o‘ziga xoslik orqada qolgan, har kim o‘zining ichki muammolariga berilib ketgandi. Mustaqillikning 30 yilida Markaziy Osiyoning barcha davlatlari xalqaro hamkorlikni shakllantirib, uzoq rivojlanish yo‘lini bosib o‘tdi”, — dedi Qirg‘iziston davlat kotibi.
Suyinbek Kasmambetov bugungi kunda Markaziy Osiyo muloqot platformalarida yagona ishtirokchi sifatida taqdim etilganini ta’kidladi.
“Biz Markaziy Osiyoda manfaatdor barcha tashqi o‘yinchilar bilan o‘zaro aloqadamiz. Bular: Xitoy, Turkiya, Rossiya, Yevropa Ittifoqi, AQSH, Hindiston, Yaponiya, Koreya, Eron. Ammo asosiy muammo shundaki, ular mintaqaga nisbatan o‘z qarashlariga ega. Bizda bunday umumiy fikr yo‘q. Hudud sifatida biz birovning kun tartibi doirasida harakat qilmoqdamiz”, – dedi spiker.
U integratsiya jihatlari, Markaziy Osiyo davlatlarining mintaqaviy o‘ziga xosligi, umumiy madaniy merosiga batafsil to‘xtalib o‘tdi.
“Bizni geografiya birlashtirgan, umumiy til ildizi, tarix, madaniyatimiz mavjud, musulmon dunyosiga mansubligimiz mushtarak. Ayni paytda mintaqaviy o‘zligimiz shakllanish bosqichida. 30 yil davomida biz hali ham yagona geosiyosiy obyektga aylanganimiz yo‘q. Shu uchun umumiy madaniy ildizlardan xabardor bo‘lish zarur. Menimcha, bu mavzu bo‘yicha muhokamani boshlashimiz kerak. Tarixiy birlikka qaytish uchun intellektual elitani muloqotga jalb qilish zarur”, — deya qo‘shimcha qildi u.
Mavzuga doir: Yevropa Ittifoqi Markaziy Osiyoga Rossiya va Xitoydan ko‘ra ko‘proq sarmoya kiritgani ma’lum qilindi
Izoh (0)