Тожикистон Соғлиқни сақлаш ва аҳолини ижтимоий ҳимоя қилиш вазирлиги ўзининг шаҳар ва туманлардаги бўлинмаларига таълим бошқармалари билан алоқада бўлиб туришни ва мавсумий касалликлар бўйича вазиятни назорат остига олишни топширди. Мактаб ўқувчилари орасида мавсумий грипп билан касалланиш ўсган тақдрида, вазирлик карантин эълон қилади. Бу ҳақда Asia Plus хабар бермоқда.
ССВ вакили Наврўз Жафаров маълум қилишича, шу ҳафта охирида вазирлик инспектори ўқув муассасаларида грипп билан касалланиш бўйича статистикани тақдим этади, шундан кейин профилактика чоралари кўрилади.
Аввалроқ Тожикистон ССВ карантин эълон қилиш учун асос йўқлигини — касаллик мамлакатда бунинг учун етарли даражада тарқалмаганини айтганди. Ўшанда Жафаров ўқувчиларнинг 50 фоизи дарсларга келмаган тақдирда карантин эълон қилинишини таъкидлаганди.
Шу билан бирга, вазирлик мамлакатда мавсумий грипп айланиб юрганини, бу қўрқинчли эмаслигини, чунки бу касаллик ҳар йили қайд этилишини маълум қилганди. Аммо баъзи фуқаролар айни пайтда тарқалган грипп симптомлари коронавирусникига ўхшаш эканини, беморлар уни жуда оғир ўтказаётганини айтмоқда. Бироқ ССВ коронавирус ҳозирча қайд этилмаганини, бу фақат мавсумий грипп эканини таъкидлади.
Тожикистонда расман тўққиз ойдан буён коронавирусга чалиниш ҳолатлари қайд этилмаяпти. Лекин декабрь бошида ССВ қўшни мамлакатларда COVID-19 га чалиниш ҳолатлари кўпайгани муносабати билан, чегараларда ва аэропортларда назоратни кучайтиришни буюрди.
Шунингдек, вазирлик аввалроқ мамлакатда H1N1-09 ёки чўчқа гриппига чалинган беморлар аниқланганини маълум қилганди. Аммо бу мавсумий грипп эканини даъво қилиб, хавотирга асос йўқлигини айтмоқда.
Айни пайтда Россияда чўчқа гриппи авж олмоқда. Касаллик унинг 74 та ҳудудида аниқланди. Шунингдек, Қозоғистон ва Қирғизистонда ҳам аҳоли орасида чўчқа гриппи тарқалмоқда.
Изоҳ (0)