Rossiyaning Murmansk viloyatidagi “Zvezdochka” zavodi ustaxonasida turgan “Admiral Kuznetsov” kreyseri bortida yong‘in sodir bo‘ldi. Bu haqda Meduza favqulodda vaziyatlar xizmati vakiliga tayanib, xabar berdi.
Manbalarga ko‘ra, kreyserdan 20 kishi evakuatsiya qilingan, hech kim jabrlanmagan. Yong‘in sabablari hozircha ma’lum qilinmagan.
Ikki yil avval, 2019-yil dekabr oyida ham Murmanskda ta’mirlanayotgan “Admiral Kuznetsov” bortida yong‘in chiqqan edi. O‘shanda ikki kishi halok bo‘lgan, yana 14 kishi jarohat olgan.
2018-yil oktabr oyida esa “Admiral Kuznetsov” ta’mirlanayotgan suzuvchi dok cho‘kib ketgan, kreyserda besh metrli teshik hosil bo‘lgan.
“Admiral Kuznetsov” — Rossiyadagi yagona aviatashuvchi kema, u 1991-yil boshida foydalanishga topshirilgan. 2017-yilda kemani ta’mirlash va modernizatsiya qilish rejalari e’lon qilindi, o‘sha paytdagi ishlar kamida 20 milliard rublga baholangan edi, bu yangi korvet qurilishidan ham ko‘proqqa tushishi ta’kidlangan. 2021-yilda kema flotga qaytishi kutilgandi, ammo bir qator hodisalar tufayli bu sanalar orqaga surildi. “Zvezdochka” zavodida kreyserni ta’mirlash qiymati, shuningdek, ishni yakunlash muddatlari oshkor etilmagan.
Mavzuga doir:
Izoh (0)