Tojikistonga O‘zbekistondan kelayotgan fuqarolarning PZR-testi manfiy bo‘lishiga qaramay, nazorat-o‘tkazish punktlarida ularning tomoq va burunlaridan koronavirusga tekshirish uchun surtma olinadi. Bu haqda So‘g‘d viloyati sanitariya-epidemiologiya stansiyasiga tayanib, Asia-Plus xabar berdi.
“Tekshiruvdan so‘ng, test natijalaridan qat’i nazar, ushbu fuqarolar So‘g‘d viloyatiga kirib kelganidan keyin 14 kun davomida uy karantinida bo‘lishi va tibbiy niqob taqishi shart”, — deyiladi SES xabarida
Tojikistonga qo‘shni davlatlarda koronavirusning omikron shtammi aniqlanganidan keyin mamlakatning nazorat-o‘tkazish punktlari va aeroportlarida epidemiologik nazorat kuchaytirilgan. Bu haqda Respublikasi Sog‘liqni saqlash vazirligining Favqulodda vaziyatlarda epidemiologik xavfsizlik va tez yordam boshqarmasi boshlig‘i Navro‘z Jafarov Asia-Plus’ga ma’lum qildi.
“Tojikistonga kelganlarning barchasi COVID-19 uchun PZR-testining manfiy natijasini taqdim etishi zarur, shu bilan birga tashrif buyuruvchilar Tojikiston Respublikasida ham koronavirus testidan o‘tishi kerak”, — dedi u.
Jafarovning ta’kidlashicha, Tojikistonga O‘zbekiston va Rossiyadan reyslar kelmoqda. Mazkur mamlakatlarda esa omikron bilan kasallanish holatlari aniqlangan.
“Shuning uchun, hozir hech kim omikronning kirib kelishidan himoyalanmagan, koronavirusning ushbu shtammi tarqalishiga yo‘l qo‘ymaslik uchun yanada qattiqroq choralar ko‘rish kerak”, — dedi u.
Eslatib o‘tamiz, 7-yanvar kuni O‘zbekistonda koronavirusning omikron shtammi aniqlangandi. Shundan buyon koronavirusga chalinganlar soni orta boshladi. COVID-19 ga qarshi kurash bo‘yicha Respublika maxsus komissiyasi qarori bilan 15-yanvardan boshlab O‘zbekiston aeroportlarida koronavirusga qarshi majburiy test topshirish joriy etildi.
Mavzuga doir: O‘zbekistonda emlanmagan xodimlar ishga qo‘yilmaydi
Shu bilan birga, Asia-Plus’ning yozishicha, tojikistonliklar noodatiy simptomlarga ega gripp bilan kasallanishni boshlagan. Respublika laboratoriyalarda yana turnaqator navbatlar paydo bo‘lgan. Shifokorlar anonim ravishda mamlakatda koronavirus borligini tasdiqlab, hozirda kasallik simptomlari avvalgilaridan farq qilayotganini ta’kidlamoqda. Ijtimoiy tarmoqlar foydalanuvchilari COVID-testining musbat natijalarini ko‘rsatuvchi fotosuratlarini ulashmoqda, deyiladi nashr xabarida.
Tojikiston Sog‘liqni saqlash vazirligi bularning barchasini mavsumiy gripp bilan bog‘lab, mamlakatda yangi shtamm borligini inkor etishda davom etmoqda. Mahalliy laboratoriyalar omikron shtammini tasdiqlay olmaydi, ularda koronavirusning turli shtammlarini o‘rganish imkoni yo‘q, deya ta’kidlagan Asia-Plus.
Izoh (0)