Turkiya prezidenti Rajab Toyyib Erdo‘g‘on Ukraina prezidenti Vladimir Zelenskiy va BMT bosh kotibi Antoniu Guterrish bilan uch tomonlama uchrashuvda qatnashish uchun Lvov shahriga yetib keldi.
Erdo‘g‘on bugunoq Ukrainada vaqtinchalik o‘t ochishni to‘xtatish rejimini joriy qilish tashabbusi bilan nutq so‘zlashi mumkin.
Shuningdek, Turkiya asirlar bilan ayirboshlash jarayonida ham vositachilik qilishi mumkin.
Avvalroq Lvovga Antoniu Guterrish yetib kelgandi. Bu uning Rossiya maxsus operatsiyasi boshlanganidan buyon Ukrainaga ikkinchi tashrifidir. Aprel oxirlarida u Kiyevda prezident Zelenskiy bilan uchrashgandi.
Uch tomonlama uchrashuvda Zaporojye AES atrofidagi vaziyat va Yelenovkadagi tergov izolyatorining o‘qqa tutilishi ustidan tekshiruv muhokama qilinishi kutilmoqda. Tomonlar, shuningdek, Qora dengiz orqali don eksporti bo‘yicha bitimning amalga oshirilishini muhokama qiladi. Guterrish Odessa portlaridan biriga bormoqchi.
Avgust boshida Sochida Erdo‘g‘on Rossiya prezidenti Vladimir Putin bilan uchrashgandi. Ikki tomonlama iqtisodiy aloqalardan tashqari, ular Ukrainadagi vaziyatni ham muhokama qildi. Erdo‘g‘on Putinga Zelenskiy bilan uchrashuv tashkillashtirib berishni taklif qildi. Kreml bunga javoban Rossiya va Ukraina o‘rtasida oliy darajada uchrashuvlar o‘tkazish uchun zarur signallar hozircha yo‘qligini aytdi. Shu bilan birga, Erdo‘g‘onning bir necha raund muzokaralarni tashkillashtirishdagi o‘rni katta, dedi Rossiya prezidenti matbuot kotibi Dmitriy Peskov.
Agar Moskva o‘zi tomonidan nazorat qilinayotgan Ukraina hududlari Rossiyaga qo‘shilish haqida referendumlar o‘tkazsa, Kiyev u bilan muzokaralardan voz kechishi haqida Zelenskiy bir necha marta ogohlantirgan. Rossiya qo‘shinlari tomonidan egallangan hududlarda, xususan, Xerson viloyatida va Zaporojye viloyatining bir qismida harbiy-fuqarolik ma’muriyatlari tuzilgan.
Izoh (0)