Navalniyning safdoshlari Fransiya va Shveysariyadan Putinning sobiq rafiqasiga tegishli ko‘chmas mulkni xatlashni so‘radi

Rossiyalik muxolifatchi Aleksey Navalniyning Korrupsiyaga qarshi kurash fondi (KKF, ekstremistik tashkilot deb e’lon qilinib, tugatilgan)dagi safdoshlari Fransiya va Shveysariya tashqi ishlar vazirliklariga murojaat qilib, Rossiya prezidenti Vladimir Putinning sobiq rafiqasi Lyudmila Ocheretnayaga qarshi sanksiyalar kiritishni so‘radi, deb yozadi Meduza.

Bundan tashqari, fond Lyudmila Ocheretnayaning hozirgi turmush o‘rtog‘i Artur Ocheretniyga qarshi sanksiyalar joriy qilishni, shuningdek, ularning mol-mulkini xatlashni talab qildi.

Avgust boshlarida Navalniy jamoasi Putinning sobiq rafiqasi haqida film e’lon qilgandi. Surishtiruvda Lyudmila va Artur Ocheretniylarning chet eldagi ko‘chmas mulklari — Biaritssadagi villa hamda Davod va Malagadagi kvartiralari haqida ham aytilgan.

“Ocheretniylarning xorijdagi ko‘chmas mulklari korrupsiya mablag‘lariga sotib olinganini isbotladik va Yevroittifoq ushbu aktivlarning barchasini xatlaydi, deb umid qilamiz… Ishonchimiz komilki, Putinning yaqin doirasidagi odamlarga qarshi sanksiyalar siyosiy va biznes-elitalarni uni qo‘llab-quvvatlashdan voz kechishga majburlaydi. Bu esa uning rejimini yo‘q qilish va Ukrainada u boshlagan urushni to‘xtatish uchun eng muhim qadamdir”, — deyiladi muxolifatchilar bayonotida.

Rossiya Ukrainaga bostirib kirganidan keyin Aleksey Navalniy safdoshlari “korrupsiyachilar va urushni alanga oldiruvchilar” ro‘yxatini yurita boshladi. Hozir unga 6,5 mingdan ortiq odam kiritilgan bo‘lib, KKF fikricha, ularga nisbatan sanksiyalar kiritish kerak.