NATO rahbari Yens Stoltenberg alyans shimoliy Kosovodagi ishtirokini oshirganini ma’lum qildi. U bu haqda Belgrad va Prishtina o‘rtasidagi muzokaralar oldidan aytib o‘tdi, deb yozadi Deutsche Welle.
Alyans rahbari Bryusselda Kosovo bosh vaziri Albin Kurti va Serbiya prezidenti Aleksandr Vuchich bilan uchrashgan. Qo‘shma matbuot anjumanida u NATO qo‘shimcha kuchlarni Kosovoga joylashtirishga tayyorligini va respublikadagi ishtirokini allaqachon oshirganini aytdi.
“Biz hozir muhim vazifani bajarmoqdamiz. Kosovodagi harbiy ishtirokimiz 4000 askarga yaqinlashmoqda. Barqarorlik tahdid ostida qolsa, NATOning Kosovodagi tinchlikparvar kuchlari (KFOR) vaziyatga aralashishga tayyor. Ular Kosovo aholisi uchun xavfsiz muhit va harakat erkinligini ta’minlashda zarur bo‘lgan barcha choralarni ko‘radi”, — dedi NATO rahbari.
Bundan tashqari, Stoltenberg barcha tomonlarni vazminlikka va zo‘ravonlikdan qochishga chaqirdi.
“Joydagi vaziyat yaxshilangan bo‘lsa-da, qayta keskinlashuvga yo‘l qo‘ymaslik barcha tomonlarning, xususan, Belgrad va Prishtina rasmiylarining zimmasida. Bizning KFOR tinchlikparvar missiyamiz o‘zining BMT mandatiga e’tibor qaratishda davom etmoqda”, — deya qo‘shimcha qildi u.
Vuchich esa Kosovo bosh vaziri bilan qiyin muzokaralar kutayotganini bildirdi, chunki G‘arbiy Bolqondagi ushbu ikki qo‘shni davlat barcha masalada hamfikr emas. Lekin uning aytishicha, tinchlik va barqarorlik hammasidan muhim.
“Ertaga bizni qiyin munozaralar kutmoqda. Deyarli hech narsa bo‘yicha kelishib olganimiz yo‘q. Bizning tariximiz oson kechmagan. NATO ham, biz ham har qanday keskinlashuv yoki mojaro ehtimolidan qochish tarafdorimiz”, — dedi Vuchich.
Avvalroq Kosovo bosh vaziri yangi mojaro yuzaga kelishi mumkinligi haqida ogohlantirgan edi.
Eslatib o‘tamiz, Serbiya va Kosovo o‘rtasidagi taranglik avgust oyi boshida yana kuchaydi. Serbiya prezidenti Aleksandr Vuchich Kosovo politsiyasi yarim tunda respublikadagi serblarga qarshi harbiy operatsiya boshlaganini da’vo qildi. 1-avgustdan boshlab Serbiya hujjatlari Kosovoda o‘z kuchini yo‘qotishi kerak edi.
Bir muncha vaqt o‘tgach, Kosovo respublikasining asosan, serblar yashaydigan shimoliy hududlarida havo hujumi sirenalari ishga tushirilgani va aholi barrikadalar qura boshlagani haqida ma’lumot paydo bo‘ldi. Keyinchalik Kosovo hukumati Yevropa Ittifoqi va AQSH elchilari bilan maslahatlashganidan so‘ng Serbiya hujjatlariga taqiq qo‘yish tartibini 1-sentabrga qoldirdi.
Ma’lumot uchun, Kosovo 2008-yilda Serbiya tarkibidan chiqib, o‘z mustaqilligini e’lon qilgan. Serbiya haligacha respublika mustaqilligini tan olmaydi. Kosovoni 116 davlat, jumladan AQSH va Yevropa Ittifoqining aksariyat davlatlari tan olgan.
Izoh (0)