Туркия президенти Ражаб Тоййиб Эрдўғон Украина президенти Владимир Зеленский ва БМТ бош котиби Антониу Гутерриш билан уч томонлама учрашувда қатнашиш учун Львов шаҳрига етиб келди.
Эрдўғон бугуноқ Украинада вақтинчалик ўт очишни тўхтатиш режимини жорий қилиш ташаббуси билан нутқ сўзлаши мумкин.
Шунингдек, Туркия асирлар билан айирбошлаш жараёнида ҳам воситачилик қилиши мумкин.
Аввалроқ Львовга Антониу Гутерриш етиб келганди. Бу унинг Россия махсус операцияси бошланганидан буён Украинага иккинчи ташрифидир. Апрель охирларида у Киевда президент Зеленский билан учрашганди.
Уч томонлама учрашувда Запорожье АЭС атрофидаги вазият ва Еленовкадаги тергов изоляторининг ўққа тутилиши устидан текширув муҳокама қилиниши кутилмоқда. Томонлар, шунингдек, Қора денгиз орқали дон экспорти бўйича битимнинг амалга оширилишини муҳокама қилади. Гутерриш Одесса портларидан бирига бормоқчи.
Август бошида Сочида Эрдўғон Россия президенти Владимир Путин билан учрашганди. Икки томонлама иқтисодий алоқалардан ташқари, улар Украинадаги вазиятни ҳам муҳокама қилди. Эрдўғон Путинга Зеленский билан учрашув ташкиллаштириб беришни таклиф қилди. Кремль бунга жавобан Россия ва Украина ўртасида олий даражада учрашувлар ўтказиш учун зарур сигналлар ҳозирча йўқлигини айтди. Шу билан бирга, Эрдўғоннинг бир неча раунд музокараларни ташкиллаштиришдаги ўрни катта, деди Россия президенти матбуот котиби Дмитрий Песков.
Агар Москва ўзи томонидан назорат қилинаётган Украина ҳудудлари Россияга қўшилиш ҳақида референдумлар ўтказса, Киев у билан музокаралардан воз кечиши ҳақида Зеленский бир неча марта огоҳлантирган. Россия қўшинлари томонидан эгалланган ҳудудларда, хусусан, Херсон вилоятида ва Запорожье вилоятининг бир қисмида ҳарбий-фуқаролик маъмуриятлари тузилган.
Изоҳ (0)