Saudiya Arabistoni sudi Twitter’da huquq himoyachilarining xabari bilan bo‘lishgan fuqaro Salma al-Shabobni 34 yilga ozodlikdan mahrum qildi, deb yozadi Meduza.
Ikki farzandning onasi bo‘lgan 34 yoshli al-Shabob Buyuk Britaniyada doimiy yashab, Lids universitetida o‘qiydi. U 2020-yil dekabrida ta’til paytida oilasini Buyuk Britaniyaga olib ketish uchun Saudiya Arabistoniga kelgan, shundan keyin hibsga olingan.
Dastlab sud al-Shabobni “veb-saytdan tartibsizliklarni uyg‘otish va jamoat xavfsizligini beqarorlashtirish maqsadida foydalanish” ayblovi bo‘yicha olti yillik qamoqqa hukm qildi — uning ayollar huquqlari uchun kurashgan siyosiy mahbuslarni ozod etish haqidagi da’vatlardan iborat tvitlari hamda huquq himoyachilari yozgan shu mazmundagi xabarlar retvitlari jinoyat deb topildi.
2022-yil 15-avgustda muddat 34 yilgacha uzaytirildi — appellyatsiyadan oldin prokuratura tartibsizliklar uyushtirmoqchi bo‘lgan shaxslarga yordam berish haqidagi yangi ayblovlarni qo‘shdi. Shuningdek, ayolga yana 34 yil davomida Saudiya Arabistonini tark etish taqiqlandi. Al-Shabobda sud qaroriga nisbatan yana bir marta apellyatsiya berish imkoniyati bor.
The Guardian qayd etishicha, al-Shabob hatto taniqli aktivist ham bo‘lmagan — uning Instagram’iga 157 kishi, Twitter’iga qariyb 3 ming kishi obuna bo‘lgan. Siyosiy postlar uning Twitter sahifasida asosiy kontent bo‘lmagan — u ko‘proq farzandlari suratlarini joylab, o‘z hayoti haqida postlar yozgan.
Hukm Saudiya Arabistoniga birinchi marta AQSH prezidenti Jo Bayden kelib ketganidan keyin bor-yo‘g‘i bir necha hafta o‘tgach chiqarildi. The Washington Post yozishicha, bu holat Saudiya tomonidan AQSH prezidentiga berilgan inson huquqlariga rioya qilish haqidagi va’dalarning barchasi yolg‘on ekanini ko‘rsatadi. Nashr tahrirriyat maqolasida Baydenni hukmga “qat’iy qarshi chiqib”, al-Shabobning ozod etilishini talab qilishga chaqirdi.
The Guardian qayd etishicha, al-Shabob uchun berilgan muddat siyosiy faollarga belgilangan muddatlar orasida maksimali bo‘ldi. Nashr eslatishicha, Saudiya qirollik oilasi turli jamg‘armalar va investitsiya kompaniyalari orqali Twitter kompaniyasi aksiyalarining katta qismini nazorat qiladi.
Izoh (0)