Moskvalik tadbirkor Aleksey Votolevskiy kanselyariya mollari, oziq-ovqat mahsulotlari va spirtli ichimliklar ishlab chiqarish uchun mo‘ljallangan “Alyaskadagi uchrashuv” brendini ro‘yxatdan o‘tkazish uchun “Rospatent”ga ariza topshirdi.
Moskvalik tadbirkor Aleksey Votolevskiy “Alyaskadagi uchrashuv” savdo belgisini ro‘yxatdan o‘tkazish uchun hujjatlarni taqdim etdi. Ariza “Rospatent”ga 15-avgust kuni, ya’ni Vladimir Putin va Donald Trampning Ankorijdagi muzokaralaridan bir kun oldin kelib tushgan. Hujjatda tovar belgisidan foydalanishning turli imkoniyatlari keltirilgan. Agar “Alyaskadagi uchrashuv” brendi muvaffaqiyatli ro‘yxatdan o‘tkazilsa, u ostida kanselyariya mollari, o‘yinchoqlar, sport anjomlari, shuningdek, konservalar, yengil tamaddilar, korn-doglar, sosiskalar, lapsha, chizburgerlar, tortlar, choy va boshqa oziq-ovqat mahsulotlarini ishlab chiqarish mumkin bo‘ladi. Bundan tashqari, sammit sharafiga aroq, viski, vino, likyor, jin hamda boshqa spirtli ichimliklarni nomlash imkoniyati ham paydo bo‘ladi”, deyiladi xabarda.
Xizmat ma’lumotlariga ko‘ra, Votolevskiy “Vesta” (non va qisqa muddat saqlanadigan un qandolat mahsulotlari, tort va pirojniylar ishlab chiqarish), “Avd Prodakt” (boshqa guruhlarga kiritilmagan oziq-ovqat mahsulotlarini ishlab chiqarish) va “Dakdarinof” (restoran faoliyati va oziq-ovqat yetkazib berish xizmatlari) kompaniyalarining ta’sischisi hisoblanadi.
15-avgust juma kuni Alyaskada AQSH va Rossiya prezidentlarining so‘nggi 4 yildan ortiq vaqt ichidagi birinchi yuzma-yuz uchrashuvi bo‘lib o‘tdi.
Donald Tramp va Vladimir Putin AQSHning Ankorijdagi Elmendorf-Richardson harbiy-havo bazasida “uchga uch” formatda muzokaralar olib bordi. Uchrashuvni ikkala tomon ham konstruktiv va samarali deb baholadi, ammo Ukrainadagi urushni to‘xtatish bo‘yicha kelishuvga erishilmadi.
Izoh (0)