Fenlar, changyutgichlar va boshqa kichik texnikalarni sotishga ixtisoslashgan Dyson kompaniyasi mustaqil ravishda predmetlarni ko‘tarishga qodir robotlar prototipini namoyish etdi.
“Dyson kompyuterga, dasturiy ta’minotga, datchiklar va mexatronikaga ixtisoslashgan 250 nafar muhandisni yig‘ib, robototexnika sohasidagi ambitsiyalarini oshirmoqda. Shuningdek, kompaniya yaqin besh yil ichida yana 700 nafar mutaxassisni yollash niyatida. Bosh reja: Buyuk Britaniyadagi Xallavington aerodromida eng zamonaviy robototexnika markazini yaratib, o‘n yillik oxiriga qadar ushbu texnologiyani uylarimizga joriy etish”, — deyiladi relizda.
Dyson tomonidan namoyish etilgan robotlar likopchalar, bolalar o‘yinchoqlarini ko‘tara oladi va 3D-model qurish orqali mebelni changyutkich yordamida tozalashga dasturlashtirilgan. Ushbu natijaga kompaniya bosh muhandisi Jeyk Dayson (kompaniya asoschisi Jeyms Daysonning o‘g‘li) boshchiligi ostida erishishga muvaffaq bo‘lingan.
Dyson’ning dastlabki tijoriy namunalari 2030-yildan sotuvga chiqishi kutilmoqda.
Avvalroq afsonaviy Boston Dynamics robot-iti yangi opsiyalarga ega bo‘lgani, Amsterdamda robot qayiqlarni sinovdan o‘tkazish boshlangani to‘g‘risida xabar berilgandi.
Izoh (0)