“Qotil-olmaxon” haqidagi o‘yin ijtimoiy tarmoqlar yulduziga aylandi (video)

Internetda juda yoqimtoy, biroq xavfli bo‘lgan olmaxon haqidagi o‘yin ommalashib ketdi, deb xabar beradi Hi-Tech.Mail.ru.

Olmaxonni VFX-rassom va mustaqil dasturchi Den DeEntremon yaratgan. U kemiruvchi haqidagi o‘yin ustidagi ishni qishda boshlagan, biroq internet foydalanuvchilari loyihaga ancha keyin e’tibor qaratgan.

Dasturchi ekshn janridagi o‘yinni bir o‘zi yaratgan. U tarmoqqa qahramon va uning atrofidagi olamga bog‘liq turli roliklarni joylab bormoqda. Qoldirilgan izohlarning aksariyatida foydalanuvchilar yungli qahramondan hayratga tushayotganini yozyapti (ayniqsa, mayda detallariga qadar ishlov berilganiga).

Ijtimoiy tarmoqda e’lon qilingan videoga ko‘ra, olmaxon bir necha turdagi qurollarni tanlashga va uning yordamida dushmanlarga qarshi kurashishga qodir. Dasturchining ta’kidlashicha, o‘yindagi fizika qonunlari real bo‘lib, mitti kemiruvchi o‘t ochgan vaqtda orqaga siljib ketadi. Quroldan qaytayotgan zarb qaysidir onda paxmoq qahramonga to‘siqlarni bosib o‘tishga ham yordam beradi.

O‘yin rasman qachon taqdim etilishi noma’lum. Dasturchi o‘yinning nomini ham hozircha e’lon qilmagan, biroq may oyidan boshlab roliklar soni orta boshlayotgani hisobga olinsa, xavfli olmaxonga bog‘liq o‘yin tez orada muxlislarga taqdim etiladi.