Amsterdamda robot qayiqlarni sinovdan o‘tkazish boshlandi — ular kanallar bo‘ylab yo‘lovchi tashib, chiqindi yig‘adi

Niderlandiya poytaxti Amsterdamda Roboats (robot qayiqlar) deb nomlangan avtonom elektr kemalarni sinovdan o‘tkazish boshlandi. Bu haqda Screen Rant xabar berdi.

Modulli konstruksiya tufayli robot qayiqlar o‘zgartirilishi va turli vazifalarga moslashtirilishi mumkin. Robotlar yuk yoki yo‘lovchilarni tashiydi, yo‘l davomida chiqindilarni yig‘adi va hatto bir-biriga ulanib, suzuvchi infratuzilma, masalan, doklar yoki ko‘priklar hosil qiladi.

Qayiqning ichki tayanch qismi akkumulyatorli elektr platformaga, harakatga keltirish va boshqarish, real vaqt rejimida suvni tahlil qilish tizimlariga asoslangan. 360 gradusli ko‘rish burchagiga ega kameralar va lidarlar suvda harakatni boshqarishga yordam beradi — bu xuddi haydovchisiz transport vositalariga o‘xshab ketadi.

Platformaning yuqori qismini almashtirish mumkin. Yo‘lovchi moduli o‘rindiqlar bilan jihozlangan va 5-6 kishini sig‘dira oladi. Bir quvvatlashda robotlar taxminan 10 soat ishlaydi, ularni simsiz zaryadlash ham mumkin.

Loyiha Massachusets texnologiya instituti kompyuter fanlari va sun’iy intellekt laboratoriyasi (CSAIL) tomonidan Amsterdam ilg‘or shahar yechimlari instituti (AMS) bilan hamkorlikda ishlab chiqilgan. Professor Karlo Rattining so‘zlariga ko‘ra, qurilmalar hali sinov bosqichida, biroq tashkilot allaqachon ularni tijoriy maqsadlarida ishga tushirishni rejalashtirgan.

“Ayni paytda bu hali prototip. Boshqarish sensorli interfeys yordamida amalga oshiriladi. Siz shunchaki manzilingizni ko‘rsatasiz va qayiq sizni u yerga olib boradi”, — deydi professor.