Livan janubida joylashgan Tir shahrida Burj-ash-Shimoliy falastinlik qochoqlar lagerida portlashlar sodir bo‘ldi. Hodisa oqibatida yaralanganlar va halok bo‘lganlar bor, deya xabar tarqatgan Livan Milliy axborot agentligiga tayanib Associated Press.
Qurbonlarning aniq soni keltirilmagan, biroq Livan xavfsizlik xizmatidagi ismi sir saqlanishini so‘ragan manba portlash oqibatida halok bo‘lganlar soni 12 nafar bo‘lishi mumkinligini ma’lum qilgan.
Dastlabki ma’lumotlarga ko‘ra dizel yoqilg‘isi bo‘lgan tirkamada yong‘in chiqqan va olov hodisaga yaqin yerda joylashgan masjidga o‘tgan, u yerda mahalliy aholining so‘zlari bo‘yicha, Falastinning HAMAS guruhiga tegishli qurol-yarog‘ saqlangan va oqibatda portlash sodir bo‘lgan.
Livan armiyasining harbiylari hodisa sodir bo‘lgan hududni qurshab olgan.
Livanda 12 ta maxsus lagerda 10 mingdan ziyod falastinlik qochoqlar istiqomat qiladi. Burj-ash-Shimoliy lageri 1955-yilda tashkil qilingan.
Eslatib o‘tamiz, 2021-yil 15-avgustda Livanning Akkara shahrida gaz tanker portlagan, hodisa oqibatida kamida 20 nafar odam halok bo‘lgan, 100 ga yaqin kishi turli darajadagi jarohatlar olgan.
2020-yilda Bayrutdagi portda tarixdagi eng kuchli yadroviy bo‘lmagan portlashlardan biri kuzatilgan. 214 nafar odam hayotdan ko‘z yumgan, 6 mingdan ziyod livanliklar jarohatlangan, yuz minglab odam uy-joysiz qolgandi. Mamlakat iqtisodiyoti tang holatda qolgan va inqiroz kundan kunga yomonlashib bormoqda.
Izoh (0)