2016-yilgi saylovlarda AQSh prezidentligiga nomzodini qo‘ygan Hillari Klinton, agar o‘sha payt g‘alaba qozonganida so‘zlamoqchi bo‘lgan 16 daqiqalik nutqini e’lon qildi, deb yozadi Meduza.
To‘liq stenogramma Klintonning MasterClass onlayn platformasi obunachilari uchun ochiq bo‘lgan “Matonat kuchi” ma’ruzasiga kiritiladi. Ushbu platformaga o‘z mahorat sirlari bilan o‘rtoqlashadigan mashhurlarning video-darslari joylanadi.
Ma’ruzadan bir kun oldin e’lon qilingan prevyuda Klintonning aytishicha, shu paytgacha u o‘z nutqini hech kimga ko‘rsatmagan, ammo endi odamlar uning kimligini, nimaga ishonishini, avlodlari va butun dunyo uchun nimani istashini yaxshiroq tushunishi uchun uni taqdim etishga qaror qilgan.
Klinton saylovdagi g‘alabasini “barcha amerikaliklarning, erkak-ayollar, o‘g‘il-qizlarning g‘alabasi” deb e’lon qilmoqchi edi, chunki bu g‘alaba AQShda insonlarga hech qanday to‘siq yo‘qligini yana bir bor isbotlagan bo‘lardi.
“Vatandoshim amerikaliklar, bugun siz butun dunyoga xabar yubordingiz. Qadriyatlarimiz bukilmas, demokratiyamiz kuchli, shiorimiz esa E pluribus unum — Ko‘pchilikdan tashkil topgan birlik bo‘lib qoladi. Bizni belgilaydigan jihat faqatgina boshqalardan ajralib turish emas. Biz ‘hammaga qarshimiz’ prinsipi bo‘yicha yashaydigan mamlakat bo‘lmaymiz. Amerika orzusi hammaga yetadi”, — deyiladi Klintonning nutqida.
AQSh tarixidagi birinchi ayol prezident bo‘lishi mumkin bo‘lgan Klinton o‘zining g‘oliblik nutqida “Amerikada har bir o‘g‘il, har bir qiz ulg‘ayganida o‘zi xohlagan insonga, hattoki AQSh prezidentiga aylanishi mumkinligini endi butun dunyo biladi” demoqchi edi. U sakkiz yoshida ota-onasi tomonidan tashlab ketilgan va qashshoqlikda o‘sgan onasi Doroti Rodham haqida ham gapirgan. Onasi 2011-yilda 92 yoshida vafot etgan.
“Uning bolalik kunlariga qaytishni, uning oldiga borib, yoniga o‘tirib, qo‘lidan ushlagancha shunday deyishni orzu qilaman: ‘Menga qara. Quloq sol. Sen yashaysan. Ajoyib oilang va uch nafar farzanding bo‘ladi. Tasavvur qilish qanchalik qiyin bo‘lmasin, qizing ulg‘ayganda, AQSh prezidenti bo‘ladi”, — deydi Klinton.
2016-yilda Klinton prezidentlik saylovlarida so‘zsiz favorit hisoblangan, biroq Donald Tramp kutilmaganda g‘alaba qozongan edi. O‘shanda so‘ngiso‘z sifatida gapirishi kerak bo‘lgan nutqida Klinton Trampning “butun mamlakat prezidenti” bo‘lishiga umid bildirgandi.
O‘sha paytda Klinton saylovda g‘alaba qozonmagani uchun uzr so‘ragan hamda amerikaliklar qonun ustuvorligi va uning oldida hamma tengligini himoyalashi zarurligi ta’kidlagan. “Endi esa buni tomosha qilayotgan barcha qizlarga aytar so‘zim: hech qachon o‘z qadr-qimmatingizga shubha qilmang, siz o‘z orzularingizga erishish uchun barcha imkoniyatlarga loyiqsiz”, — deya 2016-yildagi nutqini yakunlagan Klinton.
Izoh (0)