Apple’ning bozor bahosi O‘zbekiston YaIMdan 50 baravar ortdi

Apple tarixda kapitallashuvi 3 trillion dollardan ortgan birinchi kompaniya bo‘ldi, deb xabar beradi Spot.

Nasdaq birjasi ma’lumotlariga ko‘ra, 9-dekabr kuni bo‘lib o‘tgan kimoshdi savdosida korporatsiyaning Kupertino (Kaliforniya)dagi kotirovkalari 175 dollargacha ko‘tarilgan. Ularning eng yuqori bahosi tarixiy maksimum ko‘rsatkichni yangilagan — har bir aksiya uchun 176 dollar.

Kompaniyaning bozor bahosi hozirda 3,026 trillion dollarni tashkil etadi, o‘z cho‘qqisida esa u 3,04 trillion dollarga yetdi. Shu tarzda Apple’ning bahosi O‘zbekiston Yalpi ichki mahsulotidan 50 baravar oshdi.

Shuningdek, 2020-yil avgust oyida boshqa kompaniyalar orasida birinchi bo‘lib Apple’ning kapitallashuvi 2 trillion dollarga yetgandi. Bir oy avval Apple Saudiya Arabistonining davlat neft kompaniyasi — Saudi Aramco’ni ortda qoldirib, dunyodagi eng qimmat kompaniyaga aylangandi.

2018-yilda Apple 1 trillion dollarlik marradan o‘tgan. Kompaniyaga ikkinchi trillion uchun taxminan ikki yil, uchinchi trillion uchun esa bir yildan sal ko‘proq vaqt kerak bo‘ldi.

2021-yilning oktabr oyida Apple o‘z moliyaviy yilining to‘rtinchi choragidagi sotuvlari va olgan foydasi haqida hisobot berdi. Kompaniya o‘tgan yilga nisbatan o‘z daromadini 29 foizga – 83,4 milliard dollargacha oshirgan, biroq investorlar kutgan 85,1 milliard dollarlik marraga yeta olmagan.

Bunga kompaniyaning asosiy mahsuloti – iPhone sotuvidan olingan daromad sabab bo‘lgan. Bir qator muammolar, jumladan, chiplar yetishmasligi va butlovchi qismlarni yetkazib berishdagi kechikishlar tufayli Apple 6 milliard dollar daromaddan quruq qolgan.