Rossiyada muxolifatchi Aleksey Navalniy asos solgan Korrupsiyaga qarshi kurash fondi yuridik shaxs sifatida rasman o‘z faoliyatini to‘xtatdi. Federal soliq xizmati saytidagi yuridik shaxslarning yagona davlat reyestriga ko‘ra, fond 31-avgust kuni tugatilgan.
Fondning sobiq direktori Ivan Jdanovning ma’lum qilishicha, tashkilot tugatilishi munosabati bilan u adliya vaziri Konstantin Chuychenkoga fondni “xorijiy agentlar” ro‘yxatidan chiqarish uchun ariza bergan. Notijorat tashkilotlar to‘g‘risidagi qonunga muvofiq, xorijiy notijorat agentlik faoliyati tugatilgach, vakolatli organ bunday tashkilotni xorijiy agentlar ro‘yxatidan chiqarish to‘g‘risida qaror qabul qilishi kerak.
Korrupsiyaga qarshi kurash fondi va Navalniyga aloqador boshqa tashkilotlar Moskva prokuraturasining shikoyatiga binoan 9-iyun kuni “ekstremistik” deb e’lon qilindi, ushbu qaror Moskva shahar sudi tomonidan qabul qilindi. Ishni ko‘rib chiqish yopiq eshiklar ortida o‘tkazildi, chunki ayrim materiallar maxfiy bo‘lgan. Moskva shahar sudining qarori ustidan berilgan shikoyat apellyatsiyasi 4-avgust kuni rad etildi.
10-avgust kuni Korrupsiyaga qarshi kurash fondi rasman ekstremistik faoliyat yoki terrorizmga aloqador shaxslar va tashkilotlar ro‘yxatiga kiritildi — bunday holda ularning bank hisoblari bloklanib, yangi hisob ochishi taqiqlanadi.
Mavzuga doir: AQSh Navalniyning zaharlanishi yuzasidan Rossiyaga qarshi yangi sanksiyalar tayyorlamoqda
Navalniy 31-martdan 23-aprelga qadar mustaqil shifokorlarni yoniga kiritishlarini talab qilgan holda ochlik e’lon qildi. Siyosatchi oyog‘i va belidagi og‘riqlardan shikoyat qilgan hamda koloniyada unga zarur tibbiy xizmat ko‘rsatilmayotganini ta’kidlagan. Rossiya prezidenti Vladimir Putinning matbuot xizmati Navalniyning ochlik e’lon qilishiga izoh berishdan bosh tortgan.
Navalniy davolovchi shifokorlar tavsiyasi bo‘yicha ochlikni bekor qildi. Tibbiyot xodimlarining so‘zlariga ko‘ra siyosatchi 20-aprelda Vladimirdagi fuqarolik tibbiyot muassasasiga olib kelingan va mustaqil tibbiy ko‘rikka o‘xshab ketadigan tekshiruvlardan o‘tkazilgan.
21-aprelda Rossiyada “Navalniyga ozodlik” nomli norozilik namoyishlari o‘tkazildi. Siyosatchining tarafdorlari Navalniyning shifokorlari uning sog‘lig‘i yomonlashganini xabar qilganidan keyin mamlakatdagi odamlarni ko‘chalarga chiqib, norozilik namoyishlarini o‘tkazishga chorladi. Shifokorlarning ma’lumotidan keyin Rossiya prokuraturasi Navalniyga aloqador tashkilotlarni ekstremistik guruhlar ro‘yxatiga kiritishni talab qilgan.
Izoh (0)