Ximki shahar sudi Aleksey Navalniyni 15-fevralga qadar qamoqqa olish bo‘yicha hukm chiqardi, deb xabar berdi siyosatchining matbuot kotibiga tayanib “Interfaks”.

Foto: AP

Navalniy ushbu voqealarni “qonunbuzarlikning eng yuqori darajasi” deb atadi. Uning advokati Vadim Kobzev hibsga olish to‘g‘risidagi qaror ustidan shikoyat qilinishini ma’lum qildi.

Navalniy 17-yanvar kuni Sheremetyevo aeroportida hibsga olinganidan keyin Ximki shahridagi politsiya bo‘limiga olib ketilgan. Siyosatchi Germaniyadan kelganida pasport nazoratidan o‘tishga ulgurmasdan hibsga olindi.

U koronavirus uchun test natijasini olishga ham ulgurmagani aytilmoqda. Shu sababli ehtiyot chorasi sifatida sud majlisini militsiya bo‘limida o‘tkazishga qaror qilingan va sud o‘tkaziladigan binolarga kirish cheklangan.

Navalniy Berlindan advokat Olga Mixaylova bilan Germaniyadan uchib kelgan. Advokatning so‘zlariga ko‘ra, uning barcha kerakli hujjatlari bo‘lsa ham, Navalniyni ko‘rishiga ruxsat berilmagan. Navalniyning himoyachisi sud politsiya bo‘limida bo‘lib o‘tishini majlis boshlanishidan bir oz oldin bilib qolgan.

Eslatib o‘tamiz, 14-yanvar kuni Jazolarni ijro etish federal xizmati siyosatchi 29-dekabr kuni departament tashabbusi bilan qidiruvga berilganini xabar qildi. Xizmat uni “Iv Roshe” ishi bo‘yicha rejimni buzgan, unga muvofiq Navalniy oyda ikki marta Jazolarni ijro etish federal xizmati organlariga borib, ro‘yxatdan o‘tishi kerak bo‘lgan. Davolanishdan keyingi reabilitatsiya, xizmatning fikricha, ro‘yxatga olishga kelmaslik uchun asos bo‘lolmaydi.

Aleksey Navalniy 2020-yil avgustdan beri Germaniyada edi. U Tomsk—Moskva samolyotida o‘zini yomon his qilgani sababli davolanish uchun olib ketilgan. Tahlillar natijasiga ko‘ra, Navalniy “Novichok” guruhidagi modda bilan zaharlangani ma’lum bo‘ldi. Dekabr oyida Bellingcat va The Insider siyosatchini Federal xavfsizlik xizmatining sakkiz nafar xodimidan iborat maxsus guruh zaharlagani ta’kidlangan tekshiruv natijalarini e’lon qildi.