Ukraina prezidenti Vladimir Zelenskiy 31-avgust kuni prezident Jo Baydenning taklifi bilan AQShga uchib keldi, deb yozadi “RBK”.
Dastlab u Vashingtonda energetika vaziri Jennifer Grenxolm va mudofaa vaziri Lloyd Ostin bilan uchrashdi. 1-sentabr kuni esa Bayden bilan uchrashuv o‘tkazdi. U ikki soatdan ortiq davom etdi, aslida esa prezidentlar uchrashuviga, taxminan, 45 daqiqa ajratilgan edi.
Bayden AQSh “Rossiya tajovuzi qarshisida” Ukraina suverenitetini qo‘llab-quvvatlashning “qat’iy tarafdori” ekanini ma’lum qildi. Shuningdek, Amerika prezidenti kelajakda yana Ukrainaga tashrif buyurishiga umid bildirdi.
Ukraina prezidenti amerikalik hamkasbi bilan uchrashuvni izohlar ekan, u normal holatda o‘tganini, ammo vaziyat doim ham quyoshli bo‘lmaganini aytdi. “Umuman olganda, uchrashuv normal, mahsuldor o‘tdi, ammo doim ham quyoshli muhit bo‘lmadi. Mo‘tadil erkakcha suhbat bo‘ldi”, — dedi u.
Ukraina prezidenti Bayden bilan muloqot chog‘ida salbiy munosabatni sezmaganini qo‘shimcha qildi. “AQSh tomonidan Ukrainaga, menga, mening jamoamga nisbatan salbiy munosabat umuman bo‘lgani yo‘q, birorta ham jihatdan…”, — dedi Zelenskiy.
Shuningdek, Zelenskiy Baydenga Donbassdagi vaziyatni tartibga solish jarayonida AQSh ishtirokining bir nechta variantlarini taklif qilgan. Uning so‘zlariga ko‘ra, Bayden ushbu takliflar haqida o‘ylab ko‘rishga va’da bergan.
Uchrashuv yakunlariga ko‘ra, Kiyev va Vashington strategik sheriklik to‘g‘risida qo‘shma bayonot qabul qildi, unda “Shimoliy oqim-2” gaz quvuridan “geosiyosiy qurol” sifatida foydalanilishiga yo‘l qo‘ymaslikka va’da berishdi.
Kiyev va Vashington “Shimoliy oqim-2” gaz quvuri ishga tushirilishiga qarshi chiqadi va uni Yevropa energetika xavfsizligiga tahdid deb hisoblaydi. Shuningdek, bayonotda aytilishicha, Vashington Ukrainaning “tranzit roli”ni saqlab qolish va “ushbu o‘tish energetik davrida yetkazib berishlar xavfsizligini” ta’minlash niyatida.
Bundan tashqari, tomonlar kelishib olgan bandlar quyidagicha:
- AQSh Rossiyaning Qrim ustidan suverenitetini hech qachon tan olmaydi va Ukrainaning o‘z kelajagini o‘zi belgilash huquqini, shu jumladan, NATOga a’zolik borasida, qo‘llab-quvvatlaydi.
- AQSh Ukrainaga 60 million dollar miqdorida harbiy ko‘mak ajratadi, paket Javelin tankka qarshi raketa majmualarini o‘z ichiga oladi.
- Kiyev 2021-yilda islohotlar va demokratik o‘zgarishlar uchun Vashingtondan 463 million dollar oladi.
- AQSh va Ukraina savdo bo‘yicha o‘zaro hamjihatlik haqida memorandum tayyorladi, uning maqsadi — Amerika kompaniyalarining Ukraina iqtisodiyotida qatnashishiga va aksincha holat uchun imkoniyat yaratish.
- Vashington Ukrainaga koronavirusga qarshi kurash uchun qo‘shimcha yordam, shu jumladan, moliyaviy ko‘mak ajratadi.
Izoh (0)