AQSh Aleksey Navalniyning zaharlanishi munosabati bilan Rossiyaga qarshi yangi sanksiyalarni tayyorlamoqda. Bu haqda AQSh prezidentining milliy xavfsizlik bo‘yicha yordamchisi Jeyk Sallivan CNN telekanaliga ma’lum qildi.

Aleksey Navalniy

Foto: Babushkin tuman sudining matbuot xizmati

“Aleksey Navalniy zaharlangani uchun ilgari Rossiyaga qarshi sanksiyalar joriy qilgandik. Mazkur holat bilan bog‘liq holda qo‘llaniladigan yana bir sanksiyalar paketini tayyorlamoqdamiz”, — dedi Sallivan. Uning ta’kidlashicha, Vashington “zarur nishonlarga zarba berilayotganini” payqagan zahoti kimyoviy quroldan foydalanish yuzasidan ham sanksiyalar kiritadi.

Shuningdek, Sallivanning so‘zlariga ko‘ra, AQSh “Shimoliy Oqim 2” gaz quvuri qurilishida ishtirok etayotgan kompaniyalarga qarshi sanksiyalarni qo‘llashda davom etadi. AQSh prezidentligiga kirishganida, Jo Bayden mazkur qurilishda qatnashadigan Rossiya kompaniyalariga har 90 kunda cheklovlar qo‘yish rejasini e’lon qilgandi.

“Bayden buni amalga oshirdi va shunday qilishda davom etadi”, — dedi Sallivan.

Shu bilan birga, prezident yordamchisining ta’kidlashicha, qurilishda ishtirok etgan xorijiy kompaniyalarga qarshi sanksiyalar qo‘llanilmaydi.

Rossiya Tashqi ishlar vazirligi vakili Mariya Zaxarova Sallivanning so‘zlariga munosabat bildirar ekan, “AQShning noqonuniy xatti-harakatlariga doim tabiiy ravishda javob berib kelganmiz”, dedi.

Jeyk Sallivan yangi sanksiyalar haqida Jo Bayden va Vladimir Putinning Jenevada bo‘lib o‘tgan uchrashuvidan to‘rt kun o‘tib ma’lum qildi. Ushrashuvdan keyin Putin bergan bayonotga ko‘ra, agar AQSh, 2018-yilda Putin va Donald Trampning Xelsinkidagi uchrashuvidan so‘ng joriy qilgani kabi, Moskvaga qarshi yana yangi sanksiyalar kiritsa, bu “navbatdagi boy berilgan imkoniyat” bo‘ladi.