Turkiya yarim oy hamda yulduz shaklidagi Mudofaa vazirligi majmuasini quradi. Loyiha Pentagonga qiyoslanmoqda

Turkiya hukumati 2023-yilgacha Anqarada Ay Yıldız (“Yarim oy va yulduz”) nomi ostidagi mamlakat milliy Mudofaa vazirligi loyihasini qurib bitirmoqchi. Kompleksning ikki markaziy binosi musulmon madaniyatidagi ikki ramz, mamlakat bayrog‘ida aks etgan yarim oy hamda yulduz shaklida barpo etiladi. Bu haqda Meduza xabar qilgan.

30-avgustda Turkiya prezident Rajab Toyyib Erdo‘g‘on Anqarada mazkur majmuaning qurilishiga start berish marosimida ishtirok etdi. U loyihani “Turkiya dushmanlarini qo‘rqinchga soluvchi, mamlakat do‘stlariga ishonch bag‘ishlaydigan tuzilma” deb atagan. Erdo‘g‘onning so‘zlariga ko‘ra, bu yerda mudofaa sohasining markazlashgan yagona tizimi yaratiladi. Kompleksda Mudofaa vazirligi, markaziy shtab va barcha turdagi Qurolli Kuchlarning qo‘mondonliklari joylashadi.

“Mudofaaning o‘zgarib borayotgan ehtiyojlari armiyaning barcha bo‘linmalarini va vazirliklarni bir tom ostida birlashtirishni talab etdi”, — degan Erdo‘g‘on.

“Yarim oy va yulduz” hududi 12,6 million kvadrat metr maydonni egallaydi, shundan 890 ming kvadrat metrni yopiq bino hamda inshootlar egallaydi. Bu yerda 15 ming nafargacha odam ishlashi mumkin. Yulduz shaklidagi bino majmuaga kirish yo‘li, yarim oy binosida esa konferens-zallar bo‘ladi, tadbirlar uchun maydon ham ushbu bino oldiga joylashadi. Ayni vaqtda bo‘lajak majmua joylashadigan yerda dastlabki qurilish ishlari boshlangan.

Harbiylar binolar kompleksini AQSh Mudofaa vazirligining shtab-kvartirasi, beshburchak shaklidagi Pentagon bilan taqqoslamoqda va hatto “Turk Pentagoni” bo‘lishini aytmoqda. Biroq “Yarim oy va yulduz” loyihasining maydoni 604 ming kvadrat metrni egallagan, shundan 343 ming kvadrat metrini ofis binolari tashkil qiladigan Pentagonnikidan katta, ammo AQSh Mudofaa vazirligi binolar majmuasiga 23 ming nafar xodim joylashtirilishi mumkin.