Moskva shahar sudi Aleksey Navalniyning hududiy shtablari, Korrupsiyaga qarshi kurash fondi (KKF) va Fuqarolar huquqlarini himoya qilish fondini ekstremistik tashkilotlar deb tan olish to‘g‘risida Moskva prokuraturasi kiritgan da’voni qondirdi. Bu haqda Moskva shahar sudi matbuot xizmatiga tayanib, Meduza xabar berdi.

Foto: AP Photo

Mazkur tashkilotlarga har qanday ma’lumotni tarqatish, moliyaviy operatsiyalarni amalga oshirish, shuningdek saylovlarda qatnashish va aksiyalar tashkil etish taqiqlandi.

Shuningdek, sud KKF va Navalniyning shtablari faoliyatini taqiqlash to‘g‘risidagi qaror zudlik bilan ijro etilishi kerakligini belgilab qo‘ydi.

Buyuk Britaniya va AQSh KKFning ekstremistik tashkilot sifatida tan olinishini qoraladi.

Buyuk Britaniya tashqi ishlar vaziri Dominik Raab ushbu qarorini “haqiqiy siyosiy muxolifatni taqiqlashga urinish” deb atadi.

AQSh Davlat departamenti esa siyosatchi Aleksey Navalniyga qarshi repressiyalarni to‘xtatishga chaqirdi.

Davlat departamenti vakili Ned Praysning so‘zlariga ko‘ra, ushbu qaror muxolifat nomzodlarining sentabr oyida bo‘lib o‘tadigan Davlat Dumasiga saylovlarda qatnashish imkoniyatini cheklaydi hamda “muxolifat tarafdorlarini Rossiya Konstitutsiyasi tomonidan kafolatlangan asosiy inson huquqlaridan foydalangani uchun jinoiy javobgarlikka va qamoq jazosiga tortilishi xavfini tug‘diradi”.

“Biz Rossiyani zo‘ravon bo‘lmagan tashkilotlarga “ekstremizm” belgisini yopishtirishni to‘xtatishga, Navalniy va uning tarafdorlariga qarshi repressiyalarni to‘xtatishga, inson huquqlari va asosiy erkinliklarini hurmat qilish va ta’minlash bo‘yicha xalqaro majburiyatlarini bajarishga chaqiramiz”, — deya qo‘shimcha qildi u.

Ma’lumot uchun Aleksey Navalniy tomonidan tashkil etilgan Korrupsiyaga qarshi kurash fondi 2019-yil oktabr oyida “xorijiy agent” bo‘lgan nodavlat notijorat tashkilotlari ro‘yxatiga kiritilgan.

2020-yil iyul oyida Aleksey Navalniy KKFning yopilishi va yangi yuridik tashkilot — Fuqarolar huquqlarini himoya qilish fondi tashkil etilishini ma’lum qilgan. Tashkilot 2020-yil dekabrida “xorijiy agent” bo‘lgan nodavlat tashkilotlari ro‘yxatiga kiritilgan.

2021-yil aprelda Moskva prokuraturasi KKF, Fuqarolar huquqlarini himoya qilish fondi va Navalniyning shtablarini ekstremistik tashkilotlar deb tan olish to‘g‘risida Moskva shahar sudiga da’vo arizasi bilan murojaat qildi.

Sud qaroridan oldin Moskva prokuraturasi Navalniy shtablari faoliyatini to‘xtatib qo‘ydi. “Rosfinmonitoring” “Navalniy shtablari” jamoat harakatini ekstremistlar ro‘yxatiga kiritdi. Aprel oyi oxirida shtab yopilgani e’lon qilindi.

Iyun oyi boshida Rossiya prezidenti Vladimir Putin “KKFga qarshi qonun” deb nomlangan hujjatni imzoladi. Bu ekstremistik yoki terroristik tashkilot faoliyatida ishtirok etayotgan shaxslarning saylovlarda ishtirok etishini taqiqlaydi.