Moskvalik olim Navalniy bilan birdamlik belgisi sifatida ochlik e’lon qildi. O‘nlab odamlar uni qo‘llab-quvvatladi
Moskvada Oliy iqtisodiyot maktabi va Moskva davlat universiteti sobiq professori, biolog Nikolay Formozov Aleksey Navalniy bilan birdamlik belgisi sifatida ochlik aksiyasini e’lon qildi. Aksiyani 40 dan ortiq kishi qo‘llab-quvvatladi, deb yozadi Meduza.
Pokrov koloniyasida jazo o‘tayotgan va yaqinda ochlik e’lon qilgan siyosatchini qo‘llab-quvvatlash uchun Formozov 10-aprel kuni aksiyani boshlagan. U o‘zining ochlik aksiyasiga istalgan odam qo‘shilishi mumkin bo‘lgan Facebook guruhini ochgan. Hisoblarga ko‘ra, ayni paytda aksiyani 46 kishi qo‘llab-quvvatlagan.
Formozov o‘z harakatining asosiy maqsadi koloniyadagi fuqarolik shifokorlarini Navalniyni tekshiruvdan o‘tkazishga va unga malakali tibbiy yordam ko‘rsatishga chaqirish ekanini ta’kidladi. “Men biolog sifatida Alekseyning hayoti xavf ostida ekanini hamda faqat fuqarolarning ommaviy birdamligi va uning talablarini qo‘llab-quvvatlashgina vaziyatni o‘zgartirishi mumkinligini yaxshi tushunaman”, — dedi biolog Rossiyadagi “Ozodlik” radiosiga bergan intervyusida.
Federal jazoni ijro etish xizmati Aleksey Navalniy axloq tuzatish muassasasidan mahkumlar uchun ajratilgan viloyat kasalxonasiga ko‘chirilayotganini ma’lum qildi.
Kasalxona Vladimir shahridagi IK-3 hududida joylashgan. Federal bo‘lim Navalniyning sog‘lig‘ini “qoniqarli” deb atagan.
“Ayni paytda Aleksey Navalniyning sog‘lig‘i qoniqarli deb baholanmoqda, u har kuni umumiy amaliyot shifokori tomonidan tekshiruvdan o‘tkazilmoqda. Bemorning roziligi bilan unga vitaminli terapiya buyurildi”, — deyiladi federal bo‘lim bayonotida.
31-mart kuni Navalniy ochlik e’lon qilgan edi. “Men shifokor chaqirish va dori-darmonlar olish huquqiga egaman. Ammo shifokor ham, dorilar ham olib kelinmayapti. Belimdagi og‘riq oyog‘imga o‘tdi. Dastlab o‘ng, keyinchalik chap oyog‘imning sezish qobiliyatlari yo‘qoldi. Hazil hazil bilan, biroq vaziyat keskinlashib bormoqda. Qonun ijrosi ta’minlanmagani va huzurimga shifokor olib kelinmagani sababli ochlik e’lon qildim”, — deyiladi Navalniy xabarida.
Avvalroq The New York Times tahririyati Rossiya prezidenti Vladimir Putinga muxolifatchi Aleksey Navalniyni shifokor ko‘rigidan o‘tkazish, uning ahvoli qay darajada og‘irligini baholash va agar zarur bo‘lsa, siyosatchini intensiv terapiyaga yuborish so‘rovi bilan murojaatnoma e’lon qildi. “Agar Putin Navalniyning koloniyada o‘lishiga qo‘yib bersa, ‘qotil’ degan nomni oqlagan bo‘ladi”, — dedi murojaat mualliflari.
Shuningdek, AQSh prezidenti ma’muriyati siyosatchi Aleksey Navalniy koloniyada vafot etgan taqdirda Rossiyani javobgarlikka tortish bo‘yicha bir nechta choralarni ko‘rib chiqmoqda.
