Россияда мухолифатчи Алексей Навальний асос солган Коррупцияга қарши кураш фонди юридик шахс сифатида расман ўз фаолиятини тўхтатди. Федерал солиқ хизмати сайтидаги юридик шахсларнинг ягона давлат реестрига кўра, фонд 31 август куни тугатилган.
Фонднинг собиқ директори Иван Ждановнинг маълум қилишича, ташкилот тугатилиши муносабати билан у адлия вазири Константин Чуйченкога фондни «хорижий агентлар» рўйхатидан чиқариш учун ариза берган. Нотижорат ташкилотлар тўғрисидаги қонунга мувофиқ, хорижий нотижорат агентлик фаолияти тугатилгач, ваколатли орган бундай ташкилотни хорижий агентлар рўйхатидан чиқариш тўғрисида қарор қабул қилиши керак.
Коррупцияга қарши кураш фонди ва Навальнийга алоқадор бошқа ташкилотлар Москва прокуратурасининг шикоятига биноан 9 июнь куни «экстремистик» деб эълон қилинди, ушбу қарор Москва шаҳар суди томонидан қабул қилинди. Ишни кўриб чиқиш ёпиқ эшиклар ортида ўтказилди, чунки айрим материаллар махфий бўлган. Москва шаҳар судининг қарори устидан берилган шикоят апелляцияси 4 август куни рад этилди.
10 август куни Коррупцияга қарши кураш фонди расман экстремистик фаолият ёки терроризмга алоқадор шахслар ва ташкилотлар рўйхатига киритилди — бундай ҳолда уларнинг банк ҳисоблари блокланиб, янги ҳисоб очиши тақиқланади.
Эслатиб ўтамиз, россиялик мухолифатчи Алексей Навальний «Новичок»дан заҳарланганидан кейин Германияда даволаниб қайтгач, 2021 йил 17 январда Жазони ижро этиш федерал хизмати талабига кўра Шереметьево аэропортида ҳибсга олинган. 2 февралда Москвадаги Симонов суди Навальнийага нисбатан «Ив Роше» иши бўйича шартли муддатни қамоқ жазосига алмаштирган. Навальний маълум муддат тергов изоляторида бўлгани ва уй қамоғида ҳам сақлангани инобатга олинган ҳолда унга икки ярим йилдан кўпроқ муддатга озодликдан маҳрум қилиш жазоси тайинланган. У жазони колонияда ўтамоқда.Навальний 31 мартдан 23 апрелга қадар мустақил шифокорларни ёнига киритишларини талаб қилган ҳолда очлик эълон қилди. Сиёсатчи оёғи ва белидаги оғриқлардан шикоят қилган ҳамда колонияда унга зарур тиббий хизмат кўрсатилмаётганини таъкидлаган. Россия президенти Владимир Путиннинг матбуот хизмати Навальнийнинг очлик эълон қилишига изоҳ беришдан бош тортган.
Навальний даволовчи шифокорлар тавсияси бўйича очликни бекор қилди. Тиббиёт ходимларининг сўзларига кўра сиёсатчи 20 апрелда Владимирдаги фуқаролик тиббиёт муассасасига олиб келинган ва мустақил тиббий кўрикка ўхшаб кетадиган текширувлардан ўтказилган.
21 апрелда Россияда «Навальнийга озодлик» номли норозилик намойишлари ўтказилди. Сиёсатчининг тарафдорлари Навальнийнинг шифокорлари унинг соғлиғи ёмонлашганини хабар қилганидан кейин мамлакатдаги одамларни кўчаларга чиқиб, норозилик намойишларини ўтказишга чорлади. Шифокорларнинг маълумотидан кейин Россия прокуратураси Навальнийга алоқадор ташкилотларни экстремистик гуруҳлар рўйхатига киритишни талаб қилган.
Изоҳ (0)