Andijonlik deputat Jahongir Jiyanov viloyatda shov-shuvga sabab bo‘lgan voqeaga munosabat bildirib, “IIB xodimlariga fuqaroning qo‘lini sindirishga kim vakolat berdi?” sarlavhasi ostida fuqaro I.Sh.ga Andijon shahar IIB post-patrul xizmati xodimlarining tan jarohati yetkazgani haqida chiqish qilgandi. Bosh prokuratura axborot xizmati rahbari Hayot Shamsutdinov e’lon qilingan maqoladagi holatlar yuzasidan Andijon shahar prokuraturasi tomonidan tergovga qadar tekshiruv harakatlari o‘tkazilayotganini bildirdi. Ichki ishlar vaziri matbuot kotibi Shohrux G‘iyosov esa fuqaro I.Sh. jarohatni qayerda olgani bo‘yicha surishtiruv ishlari amalga oshirilayotganligini bildirgandi.
“Daryo” muxbiri bilan suhbatlashgan jabrlanuvchi voqea qanday yuz bergani va o‘sha kuni nimalar bo‘lganini so‘zlab berdi.
Imron Shahobovning aytishicha, 2021-yil 12-iyul kuni u sheriklari bilan kafeda o‘tirgan bo‘lgan. Ularning oldiga PPX xodimlari kelib, uyga kirib ketishlarini so‘ragan. Muloqot davomida fuqaro va xodim o‘rtasida kelishmovchilik kelib chiqqan.
“2021-yilning 12-iyul kuni chamasi tungi soat 23:00 da Eski shahar hududidagi kafeda sheriklarim bilan o‘tirgandik. Men qo‘limdagi qog‘ozni o‘qiyotgandim. Shunda post-patrul xizmati xodimlari yonimizga kelib, o‘zlarini tanishtirmasdan to‘g‘ridan to‘g‘ri ‘Bo‘ldi endi kirib ketinglar’, dedi. Qo‘limdagini o‘qib bo‘lmaganim uchun ‘Akalar, besh minutda kirib ketamiz’, dedik. Bunga javoban xodimlardan biri ‘Bizga shart qo‘ya olmaysiz, mumkin emas. Karantin qonun-qoidalari bor’, dedi. Shunda unga ‘Karantinning qaysi qoidasini buzdik?’ degan savol bilan yuzlanganimizda ‘Menga shart qo‘ymasdan tezlashinglar’, degan javobni berdi.
U bizga o‘zini tanishtirmasdan qo‘pol muloqotda bo‘ldi. Unga tartib bo‘yicha o‘zini tanishtirishi kerakligini aytsam, yordamchi kuch chaqirib, meni ichki ishlar bo‘limiga olib borishini bildirdi. Shundan keyin viloyat Ichki ishlar boshqarmasining navbatchilik qismiga qo‘ng‘iroq qilib, xodimlari qo‘pol munosabatda bo‘layotganini, ushbu masalani yechib berishlarini so‘radim. Navbatchi holatni o‘rganish uchun xodim yuborishini aytdi. O‘n-o‘n besh daqiqaga yetmasdan xodim voqea joyiga yetib keldi. Aytishicha, kelgan xodim ularning rahbari ekan. Ajablanarlisi, u ham o‘zini tanishtirmadi.
IIB xodimining rahbari hech qanday karantin qoidalarini buzmaganligimni ko‘rib, ketishimga ruxsat berdi. Xodim esa ketayotsam, ‘Bular hali dubinka yemaganda, shuning uchun bizning bemalol ustimizdan kulib ketyapti. Siz esa qo‘yib yuboryapsiz, bu qanaqasi? Cho‘ntagiga bir narsa solib, ichkariga olib kirib qo‘yish kerak’, degan qo‘pol gaplarni aytdi. U yerda guvohlar ham bor edi. Bu gaplardan keyin jim turolmasdan ‘Rahbaringiz ruxsat bergani uchun ketyapmiz?’ dedim. U esa kerak bo‘lsa, rahbariga ham bo‘ysunmasligini baland ovozlar bilan ta’kidladi”, — deydi Imron Shahobov.
Shahobovning ta’kidlashicha, xodimlarning qo‘pol munosabatda bo‘lganligi uchun ularning ustidan viloyat IIB navbatchilik qismiga yozib bergan. Ariza yuzasidan 13-iyul kuni tonggi soat 04:00 da ariza bo‘yicha Eski shahar hududiga chaqirilgan.
“To‘g‘risi, bunday munosabatda bo‘lganliklaridan g‘ashim kelib, yo‘lda 102 ga telefon qilib, bo‘lgan voqeani birma-bir aytib berdim va o‘rganib chiqishlarini so‘rab, ariza berdim. 13-iyul kuni tonggi soat 04:00 da notanish raqamdan qo‘ng‘iroq qilib, ichki ishlardan ekanligini aytib, Eski shahar hududiga kelishimni so‘radi. Men bordim. Ko‘rishdik, chaqirgan podpolkovnik ekan. Borgan joyimda xodimlarning shu yerdaligini ko‘rdim. Podpolkovnik kelishim bilanoq mendan kecha nima bo‘lganini so‘radi. Shunda ‘Siz meni bu yerga kechagi arizam bo‘yicha chaqirdingizmi yoki ‘razbor’ga?’, — deya savol bilan murojaat qilsam, ‘Kechagi holat bo‘yicha bilib olishim kerak’, dedi.
Unga agar ariza yuzasidan chaqirilgan bo‘lsam, dastlabki tergovga qadar surishtiruvda yuzlashtirish mumkin emasligini aytib, e’tiroz bildirdim. U esa o‘zini katta joyda ishlagan odamligini ta’kidlab, aqllilik qilmasligimni so‘radi. Shundan keyin ularga ‘Sizlar bilan qonun doirasida gaplashamiz. Kerak bo‘lsa, arizamni yuqori tashkilotlarga yozaman’, deb teskari qarab ketayotsam, to‘xtashimni aytishdi. Gaplashadigan gap qolmaganligini aytib, yo‘limda davom etdim. Ular esa orqamdan quvlashdi. Achinarlisi, huquqni muhofaza qiluvchi organ xodimi har bir so‘zida haqorat qilib, o‘ldirishini aytardi. Men yo‘lning narigi tomoniga qarab yugurib, o‘tib ketdim. Orqamdan quvlab yeta olishmadi. Ularning qo‘lida quroli bor, dubinkalari turgandi. Yuzidagi vajohat urish maqsadi borligini ko‘rsatib turardi. O‘sha atrofdagi masjid mahallasida yashayman, o‘sha yerga kirib ketdim. Piyoda bo‘lganim uchun yugurib hansirab qoldim.
Mahallamizdagi profilaktika inspektorining uyiga yetay deganimda orqamdan PPX mashinasi katta tezlikda kelayotganini ko‘rdim. Inspektorning xizmat uyi derazasini taqillatganimda, uydan hududimizga javob beruvchi emas, umuman boshqa xodim chiqdi. Shu vaqtda quvlayotganlar yetib kelib, bo‘ynimdan bo‘g‘ib, qo‘limni qayirib, kishan solib, urishdi va mashinaga mindirishdi. Mashina ichida ham qiynoqlar bo‘ldi, lekin buni hozir sizlarga aytib berolmayman. Xudo xohlasa, ekspertiza natijalari buni tasdiqlaydi.
Xodimlar meni rahbarining oldiga olib borishdi. Podpolkovnik janoblari agar ulardan kechirim so‘ramasam, olib kirib qo‘yishini aytib, kurakda turmaydigan gaplar bilan haqorat qilib, o‘ta qo‘pol muomalada bo‘ldi.
O‘rtada ancha gaplar bo‘ldi. Orada podpolkovnik mahallamizda yashovchi bir akaxonimizni tanish-tanimasligini so‘radi. Tanish ekanligimni, yaxshi insonligini, u ham meni bilishini aytganimdan keyin qo‘limdagi kishanni yechdi. Keyin o‘zi uyimga olib borib qo‘ydi”, — deydi Shahobov.
Fuqaroning qayd etishicha, uyga kirib, qo‘lini yuvayotganida qo‘lida og‘riq bo‘lgan. Shundan so‘ng 103 ga qo‘ng‘iroq qilgan.
“O‘sha paytgacha hech qayerimda og‘riq sezmagandim. Lekin uyga kirib qo‘limni yuvayotganimda, qo‘limda ozgina og‘riq bo‘ldi. Vaziyatni tushuntirganimda uyimdagilar 103 ga telefon qilib, chaqirishdi. Tez tibbiy yordam xodimlari kelib, qo‘lingiz singan shekilli deb, olib ketishdi. O‘sha yerda ichki ishlar xodimlari qiynoqqa solishganini aytdim. Qo‘llarimni rentgen qilganimizda siniq chiqdi. Shifokorlar muolaja qilishdi. O‘sha kuni shifoxonadan chiqib, shahar prokuraturasiga qonuniy chora ko‘rishliklarini so‘rab, ariza yozib berdik. Tergovga qadar surishtiruv ishlari boshlandi. Ekspertizaga yo‘llanma qilib berishdi.
Buni eshitgan ichki ishlar xodimlari darrov yetib kelishib, nima uchun ariza yozayotganligimni so‘rashib, ‘Kelishib olgandik-ku’ deyishganda, ‘Nimani kelishib olgandik? Axir qo‘limni sindirib yubordi xodimlaringiz. Nega o‘sha paytda ularni rahbar bo‘la turib tartibga solmadingiz’, deb ularning oldidan ketdim”, — deydi Imron Shahobov.
Shahobovning ta’kidlashicha, prokuraturaga yozib bergandan so‘ng organ xodimlari tomonidan unga turli tazyiq va qo‘rqitishlar bo‘lmoqda.
“Post-patrul xizmatida ishlaydigan Farhod ismli mas’uli bor. Ariza yozganimdan keyin u yonimga kelib, avvaliga muloyim gapirib, xodimlarining aybini bo‘yniga olib, ularning nomidan kechirim so‘radi. Ko‘rgan zararimni qoplab berishini, evaziga arizamni qaytarib olishimni iltimos qildi. Men esa bu ish qonun doirasida o‘rganilayotganligini, buning ilojisi yo‘qligini aytib, iltimosini rad qildim. U bilan inspeksiyaga bordik, o‘sha yerda Said ismli bola bor ekan, u ham boshida kechirim so‘rayman degandi, qonun doirasida chora ko‘rilishini bildirdim. Shundan keyin qo‘rqitishni boshladi, ko‘cha-ko‘yda tazyiq o‘tkazilmoqda. Xodimlar ko‘rgan yerida ‘Seni yo‘q qilib yuboramiz, uzoqqa bormaysan. Baribir qo‘limizga tushasan’, degan gaplar bilan qo‘rqitishmoqda”, — deydi Shahobov.
Fuqaro Ichki ishlar vazirligi axborot xizmati rahbarining izohida keltirib o‘tilgan fevral oyida ham xuddi shu mazmunda, ya’ni ichki ishlar organi xodimi uning qo‘l barmoqlarini sindirgani haqida murojaat qilinganini, lekin prokuratura organlari tomonidan o‘tkazilgan tekshiruv natijasida uning ko‘rsatmalari o‘z tasdig‘ini topmagani bo‘yicha o‘z fikrlarini bildirgan.
“Shahar kengashi deputati Jahongir Jiyanovga holat bo‘yicha gapirib bergandim. U ijtimoiy tarmoqlardagi sahifalarida e’lon qildi. Meni ajablantirgani Ichki ishlar vazirligi tomonidan e’lon qilingan munosabat bo‘ldi. Munosabatda ular meni shifoxonaga ertasi kuni kelgan demoqda, lekin men o‘sha kunning o‘zida borganman. Bundan tashqari bundan oldin ham, fevral oyida men bilan shunday voqea yuz berganligini qayd etishgan. Haqiqatan fevral oyida qo‘lim singan edi. Faqat unda o‘ng tarafidan. O‘shanda menga nisbatan 168-modda bilan jinoyat ishi qo‘zg‘atilib, tergov jarayoni ketayotgandi. Tergovchi meni jabrlanuvchi bilan yuzlashtirish vaqtida kelishmovchilik kelib chiqqan. Aynan o‘sha paytda elektrda uzilish yuz berib, xona qorong‘i bo‘lganda xodim qo‘limni qayirib, olib chiqib ketgandi. Xodimning ehtiyotsizligi oqibatida o‘ng qo‘lim singandi. Bu bo‘yicha jinoyat ishi yopilgan. Hech kim hech qanday jazo olmagan”, — deydi Shahobov.
“Daryo” muxbiri vaziyatga oydinlik kiritish maqsadida xodim bilan ham suhbatlashishga harakat qilgan, biroq buning imkoni bo‘lmagan. Viloyat Ichki ishlar boshqarmasi axborot xizmati mas’ullari holat bo‘yicha vazirlik tomonidan tegishli munosabat bildirilganini, yakuniy xulosa prokuratura organlari tomonidan olib borilgan tergov jarayonlari yakunida berilishini ta’kidlagan.
Izoh (0)