Buxoro viloyatining Olot tumanidagi 46 yil oldin qurilgan “Ikki daha” suv tozalash inshooti modernizatsiya qilindi, deya xabar berdi “Daryo” muxbiri.
Buxoro shahri markazidan, taxminan, 130 kilometr olisdagi ushbu suv tozalash inshooti 1975-yil qurib bitkazilgan bo‘lib, Olot va Qorako‘l tumanlari kesishmasidagi suv yo‘lida joylashgan.
“Buxoro suv ta’minoti” MChJ direktori Shohruxali Sa’dullayevga ko‘ra, eskirgan ushbu inshoot qurilganidan buyon biror marotaba modernizatsiya qilinmagan. Suv quvurlari eskirgan, nasoslar va elektr jihozlaridan foydalanish xavfsizligi ta’minoti yetarli darajada bo‘lmagan. Bu bevosita inshootdan aholiga yetkaziladigan suv sifatining iste’molga yaroqsiz holda bo‘lishiga olib kelgan. Besh yildan buyon aholiga ichimlik suvi yetkazib berish quvvati sutkasiga bor-yo‘g‘i, 12 ming metr kubni tashkil etgan.
“46 yildan so‘ng suv inshootining modernizatsiya qilingani Qorako‘l va Olot tumanlarining 230 ming aholisini toza ichimlik suvi bilan ta’minlash yo‘lidagi ulkan g‘alaba, desak adashmagan bo‘lamiz. Zero, bu ikki chekka tuman aholisi toza ichimlik suvi masalasida uzoq yillar davomida muammolarga uchrab kelgan. Inshootda modernizatsiyalash ishlari Jahon bankining qiymati 139 million dollarlik krediti asosida amalga oshirildi. Amudaryo suvlari yirik suv omborxonalarida zamonaviy usulda uch marotaba tozalanib, filtrlanadi. Bu orqali bir kunlik ichimlik suvini yetkazib berish quvvati 50 ming kub metrga yetkazildi. Bu Olot va Qorako‘l tuman aholisining ichimlik suvidagi ehtiyoji to‘liq qoplanadi, degani. Yana bir ahamiyatli jihati, avvalgi yillarda ichimlik suvi tarmoqlari faqatgina aholi yashash punktlarigacha yetkazilardi. Joriy yildan boshlab esa ichimlik suvi tarmoqlari aholi xonadonlarigacha tortilib, hisoblagichlar o‘rnatilmoqda”, — dedi Shohruxali Sa’dullayev.
Buxoro hokimi Botir Zaripov mazkur yirik suv inshootida bo‘lib, Olot va Qorako‘l aholisining ichimlik suvi bilan ta’minlanganlik holati hamda suv sifati darajasini yaxshilash bo‘yicha olib borilayotgan ishlar bilan tanishgan.
“Suv ta’minoti tizimlarida suv juda arzon narxda tarqatilishini hisobga olish zarur. Viloyatimizda bir metr kub ichimlik suvi o‘rtacha tarifda aholi iste’molchilari uchun 2450 so‘mni, budjet tashkilotlari va boshqa ulgurji iste’molchilar uchun 4420 so‘mni tashkil qiladi. Uning qiymati savdo do‘konlarida sotiladigan suvga qaraganda arzonligini ko‘rsatmoqda. Shuningdek, 1 kVt/soat elektr energiyasi narxi 295 so‘m, 4—5 kishilik oilaning bir oylik iste’moli 60—70 ming so‘mni, 1 kub metr tabiiy gaz 380 so‘m, xuddi shu oilaning bir oylik iste’moli 200—250 ming so‘mni tashkil etadi. Shu oila bir oy davomida 15 ming litr ichimlik suvi iste’mol qilsa, uning narxi 15—16 ming so‘m atrofida bo‘ladi. Ko‘rinyaptiki, bugungi kunda ichimlik suvi narxi kommunal to‘lovlar orasida eng past ko‘rsatgichni tashkil etmoqda”, — dedi viloyat rahbari.
Buxoro hokimi, shuningdek, suv manbalari cheksiz emasligini, uni qadrlash va tejash madaniyatini ham unutmaslik kerakligini ta’kidlagan. Va ayrim xonadonlardagi hovuz, basseynlar ichimlik suvi bilan to‘ldirilishini, bog‘lar soatlab sug‘orilishini, isrofgarchilik yuqoriligini tanqid qildi.
“Har bir fuqaro ichimlik suvidan foydalanishda tejamkorlikka amal qilsa, yildan yilga kamayib borayotgan suv zaxiralarining kelgusi avlodlarga ham yetib borishini ta’minlagan bo‘ladi”, — degan Botir Zaripov.
Izoh (0)