Toshkentning Yakkasaroy tumanida dori vositalarining noqonuniy muomalaga kiritilishining oldi olindi, deb xabar beradi Bosh prokuratura huzuridagi departament.
Ma’lum qilinishicha, Bosh prokuratura huzuridagi departament hamda DXXning Yakkasaroy tuman bo‘limlari tomonidan tezkor tadbir o‘tkazilgan. Tadbirda “K” MChJ xodimi F.N. dori vositalarini noqonuniy muomalaga kiritish orqali daromad orttirishni ko‘zlab, xaridorga O‘zbekistonda ishlab chiqarilgan “Remdessa” 100 mg dori vositasining har bir donasini 350 ming so‘mdan hisoblab, 500 donasini jami 175 million so‘mga sotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 186-3-moddasi (dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Sirdaryoda 700 dan ortiq “Tropikamid” dori vositasining noqonuniy aylanmasiga chek qo‘yilgani, Toshkentdagi “Sergeli” blokpostida kuchli ta’sir qiluvchi moddalar olib kirmoqchi bo‘lgan shaxs qo‘lga olingani, Toshkentda qariyb 100 million so‘mlik kuchli ta’sir qiluvchi dori vositalarining noqonuniy aylanmasining oldi olingani haqida xabar berilgan edi.
Izoh (0)