Olmazor tumani hokimi Abdumajid Mullajonov vafot etdi

Olmazor tumani hokimi Abdumajid Mullajonov 51 yoshida vafot etdi. Bu haqda poytaxt hokimligi matbuot xizmati xabar berdi.

“Toshkent shahar hokimligi Olmazor tumani hokimi Abdumajid Mullajonov vafoti munosabati bilan uning oila a’zolari va yaqinlariga chuqur hamdardlik bildiradi.

Abdumajid Mullajonov uzoq yillar davomida davlat idoralarida samarali mehnat qilib, yurtimiz rivojiga munosib hissa qo‘shgan tashabbuskor rahbar, samimiy inson edi. Abdumajid Mullajonovning yorqin xotirasi qalbimizda abadiy qoladi”, — deyiladi hokimlik xabarida.

“Daryo” manbasining ma’lum qilishicha, uning o‘limiga miokard infarkti sabab bo‘lgan.

Ma’lumot uchun, Abdumajid Mullajonov 1970-yilda Sirdaryo viloyatida tug‘ilgan. 1996-yilda Toshkent davlat yuridik institutini tamomlagan. Ko‘p yillar davomida qator rahbarlik lavozimlarida faoliyat yuritgan.

U 2019-yildan Toshkent shahar Olmazor tumani bo‘yicha Ichki ishlar organlari faoliyatini muvofiqlashtirish boshqarmasi boshlig‘i, 2021-yilning martidan tuman hokimi lavozimida ishlab kelayotgan edi.

Podpolkovnik Abdumajid Mullajonov 2019-yilda “Sodiq xizmatlari uchun” medali bilan taqdirlangan.

Pandemiya davrida vafot etgan hokimlar va ularning o‘rinbosarlari

2020-yil 21-oktabr kuni Toshkent viloyati hokimi birinchi o‘rinbosari Bahodirbek Mullaxonov, 19-oktabr kuni Kattaqo‘rg‘on tumani hokimi A’zamxon Bahromov vafot etgani haqida xabar berildi. 7-oktabr kuni Andijon viloyati Oltinko‘l tumani hokimi Nazirjon O‘rinboyev va Namangan viloyati hokimi o‘rinbosari Bahromjon Nurmatov uzoq davom etgan xastalikdan so‘ng vafot etgani ma’lum bo‘lgandi. 29-sentabr kuni Andijon viloyatining Xonobod shahri hokimi Musaxon Mamadaliyev o‘tkir yurak qon-tomir yetishmovchiligi kasalligidan vafot etgani e’lon qilingan edi.

20-sentabr kuni Buxoro viloyatining sobiq hokimi, bosh vazir o‘rinbosari O‘ktam Barnoyev, 8-sentabrda Qashqadaryo viloyati Mirishkor tumani hokimi G‘ayrat Begaliyev, 22-avgustda Buxoro viloyati hokimi Karim Kamolov, 24-iyulda Qoraqalpog‘istonning Qonliko‘l tumani hokimi Daulet Tolibayev vafot etgan. Ular koronavirus infeksiyasi asoratlari oqibatida vafot etgan.