Suriya prezidenti Bashar Asad va uning turmush o‘rtog‘i Asma Asad koronavirusdan sog‘aydi. Bu haqda prezident devonxonasining Facebook’dagi rasmiy akkauntiga tayanib “RBK” xabar berdi.
30-mart, seshanba kunidan boshlab Asad va uning turmush o‘rtog‘i to‘liq tartibda ish faoliyatiga qaytadi.
8-mart kuni Asad va uning xotini koronavirusga chalingani ma’lum bo‘lgan edi. Shundan so‘ng davlat rahbari xotini bilan birgalikda o‘zini yakkalash tartibiga o‘tdi va masofaviy ishlashda davom etdi.
Ma’lumot uchun, Suriyada koronavirusga chalinish bo‘yicha birinchi holat 2020-yilning 23-mart kuni ro‘yxatga olingan. 2021-yilning fevral oyida hukumat Rossiyaning koronavirusga qarshi “Sputnik V” vaksinasini ma’qulladi.
Jahon sog‘liqni saqlash tashkiloti (JSST) ma’lumotlariga ko‘ra, 2021-yilning 29-mart holatiga ko‘ra, Suriyada koronavirus bilan kasallanish bo‘yicha 18 498 ta holat aniqlandi.
Pandemiya davrida 1239 kishi koronavirus qurboniga aylandi. 29-mart kuni 142 kishida koronavirus aniqlandi.
Avvalroq Portugaliya prezidenti Marselu Rebelu di Sozaning koronavirus infeksiyasiga topshirgan testi musbat natija ko‘rsatgani haqida xabar berilgandi. Shuningdek, Armaniston prezidenti Armen Sarkisyan oilasi bilan Yangi yil ta’tilini o‘tkazish paytida London shahrida koronavirus yuqtirib olgan. Prezident matbuot xizmati unda kasallik og‘ir kechganini ma’lum qilgan.
Bundan tashqari, Braziliya vitse-prezidenti, Fransiya prezidenti Emmanuel Makron, Shvetsiya shahzodasi Karl Filipp va malika Sofiyada hamda Ukraina prezidenti Vladimir Zelenskiyda koronavirus aniqlangan.
Eslatib o‘tamiz, AQShning sobiq prezidenti Donald Trampda 1-oktabr kuni koronavirus aniqlangandi. AQSh sobiq prezidenti bir necha kun kasalxonada davolangan va u yerdan 5-oktabr kuni chiqqan. Noyabr oyining oxirida esa Trampning o‘g‘li kichik Donald Tramp koronavirusga chalingan.
Izoh (0)