Rossiya prezidenti Vladimir Putinning asosiy xobbisi — kitobxonlik. Bu haqda prezident matbuot kotibi Dmitriy Peskov jurnalistlarga bergan intervyusida aytib o‘tdi, deb yozadi “RBK”.
“Uning asosiy sevimli mashg‘uloti — bu mutolaa. U asosan tarixiy adabiyotlar, yodnomalar va boshqalarni o‘qiydi”, — dedi matbuot kotibi.
Peskovning ta’kidlashicha, prezidentga o‘zi uchun tayyorlangan press-dayjestlar taqdim qilinsa ham, uning o‘zi gazetalarga obuna bo‘ladi va ularni tez-tez ko‘rib chiqadi.
Chet tillarda mutolaa qilish haqida berilgan savolga matbuot kotibi Putin “nemis telekanallarini tomosha qiladi, boshqa telekanallarni ingliz tilida ko‘radi, shuningdek, haftada bir necha marta ingliz tilini o‘rganish bilan alohida shug‘ullanadi”, deb javob berdi.
Avvalroq Peskov Putin har kuni sport bilan shug‘ullanishini aytgan edi. Unga ko‘ra, prezident doimiy ravishda sambo, shuningdek, suzish va xokkey bilan shug‘ullanadi.
Shuningdek, Putin tabiat qo‘ynida dam olishni yaxshi ko‘rishi ham ma’lum. Masalan, 2017-yil yozida Rossiya rahbari Tuvada ta’til o‘tkazib, baliq ovlagan. 2019-yil oktabr oyida Putin va mudofaa vaziri Sergey Shoygu Sibir o‘rmoniga tashrif buyurgan va qo‘ziqorin tergan, 2021-yilning mart oyida ham vazir va prezident birgalikda dam olish kunlarini o‘rmonda o‘tkazdi.
Eslatib o‘tamiz, 23-mart kuni Rossiya prezidenti Vladimir Putin koronavirusga qarshi emlandi. Putin omma oldida emlanishdan bosh tortgan. Peskov prezident “kameralar nishoni ostida” vaksina olishni yoqtirmasligini aytgandi. Prezident matbuot kotibi Putin “vaksinalar targ‘iboti uchun shundoq ham ko‘p narsa qilayotgani”ni ta’kidlagan. Putin qaysi vaksina bilan emlangani noma’lum. Kreml bu ma’lumotni oshkor qilishdan bosh tortdi.Kreml Vladimir Putinning vaksina olish to‘g‘risidagi qaroridan keyin mamlakatda koronavirusga qarshi emlash sur’atining oshishiga umid qilmoqda.
Avvalroq Rossiya Davlat dumasi Putinga yana prezidentlikka nomzodini qo‘yish imkonini beruvchi qonunni qabul qilgani haqida xabar berilgandi.
Izoh (0)