Italiya bosh vaziri Mario Dragi koronavirusga qarshi AstraZeneca vaksinasining birinchi dozasini qabul qildi. Bu haqda hukumat rahbari matbuot xizmatiga tayanib “Korrespondent.net” xabar berdi.
“Vazirlar Kengashining raisi Mario Dragi va uning rafiqasi Mariya Serenella Kappello Rimning Termini temiryo‘l stansiyasidagi vaksinatsiya markazida Latsio metropoliteni hududida ko‘zda tutilgan emlash taqvimiga muvofiq vaksina qabul qildi”, — deyiladi xabarda.
73 yoshli Dragi 19-mart kuni AstraZeneca’dan foydalanishni to‘xtatib turish fonida o‘zining aynan ushbu preparat bilan emlanishini ma’lum qilgan edi.
Avvalroq Fransiya bosh vaziri to‘g‘ridan to‘g‘ri efirda koronavirusga qarshi AstraZeneca vaksinasi bilan emlangan edi. Shuningdek, Gruziya prezidenti, Tailand bosh vaziri koronavirusga qarshi AstraZeneca vaksinasi bilan emlangan.
Yaponiya bosh vaziri Yosixide Suga Pfizer kompaniyasining vaksinasi bilan emlandi. U koronavirusga qarshi jamoatchilik oldida emlangan birinchi yapon amaldori bo‘ldi. Vaksinatsiya vazirning AQSh prezidenti Jo Bayden bilan aprel oyiga rejalashtirilgan uchrashuvi oldidan amalga oshirildi.
Ukraina prezidenti Vladimir Zelenskiy esa koronavirusga qarshi Hindistonda ishlab chiqarilgan vaksina bilan emlandi. Zelenskiyni emlash uchun Hindistondagi zavodda AstraZeneca tomonidan ishlab chiqarilgan Covishield vaksinasidan foydalanildi. Prezidentning so‘zlariga ko‘ra, u vaksinani “askarlar bilan old qatorda turadigan bosh qo‘mondon singari birinchilardan bo‘lib” qabul qildi.
12-fevralda Turkiya prezidenti Rajab Toyyib Erdo‘g‘on unga koronavirusga qarshi vaksinaning ikkinchi dozasi yuborilganini ma’lum qilgan, Erdog‘on vaksinaning birinchi dozasini 14-yanvarda qabul qilib olgandi.
Bundan avval Shahzoda Charlz va uning rafiqasi, BMT bosh kotibi, Bill Geyts hamda Argentina prezidenti koronavirus vaksinasi bilan emlangan.
Izoh (0)